Faceook ၌တင်ထားသည့် ဓါတ်ပုံများကိုအသုံးပြု၍ ညစ်ညမ်းပုံအဖြစ်ဖန်တီကာ ဖြန့်ဝေမည်ဟုခြိမ်းခြောက်ခံ ရသည့် ဆယ်တန်းကျောင်းသူ ကြိုးဆွဲချ
ရခိုင်ပြည်နယ်၊ ရသေ့တောင်မြို့နယ်အတွင်းရှိ ဆားပြင်ကြီးကျေးရွာတွင်နေထိုင်သည့် တက္ကသိုလ်ဝင်တန်း ကျောင်းသူတစ်ဦးသည် ၎င်း၏လူမှုကွန်ရက်စာမျက်နှာအကောင့်တွင်တင်ထားသည့် ဓါတ်ပုံအားယူကာ ညစ်ညမ်းပုံအဖြစ် ပြောင်းလဲဖြန့်ဝေမည်ဟုခြိမ်းခြောက်ခြင်းခံရသောကြောင့် ကြိုးဆွဲချသေဆုံးသွားခဲ့ကြောင်း ဒေသခံများထံကသိရသည်။
ကြိုးဆွဲချသေဆုံးခဲ့သည့် အသက် ၁၇ နှစ်အရွယ် တက္ကသိုလ်ဝင်တန်းကျောင်းသူ၏ သေတမ်းစာတွင်လည်း အ ထက်ပါအတိုင်းခြိမ်းခြောက်ခံထားရကြောင်းကို ထည့်သွင်းရေးသားထားပြီး သေဆုံးသူမိန်းကလေးမှာ မွေးချင်း ၅ ဦးအနက် အငယ်ဆုံးဖြစ်ကြောင်း မိသားစုနှင့်နီးစပ်သူများကဆိုသည်။
“အခုလို သူတစ်ပါး အသက်သေတဲ့အထိဖြစ်အောင် ဘာလို့များလုပ်ရက်ကြတာလဲ မသိပါဘူးဗျာ။ သူက ဘောလုံးကန်တာ ဝါသနာပါသလို၊ အကို (၅) ယောက်နဲ့နေတာဆိုတော့ ကိုယ်တိုင်လည်း ယောကျာ်းလေးလိုပါပဲ။ မောင်နှမ (၆) ယောက်ရှိတဲ့အထဲမှာ သူက အငယ်ဆုံးနဲ့ တစ်ဦးတည်းသော သမီးမိန်းကလေးလည်းဖြစ်တော့ မိဘတွေ ရင်ကျိုးရတာပေါ့ဗျာ” ဟု မိသားစုနှင့် နီးစပ်သူတစ်ဦးက ပြောကြားခဲ့သည်။
သေဆုံးသူကို နိုဝင်ဘာလ (၃) ရက်နေ့၊ မနက်ပိုင်းတွင် ကျေးရွာသုသာန်၌ သဂြိုလ်ခဲ့ပြီး ရသေ့တောင်မြို့နယ် ရဲစခန်းက သေမှုသေခင်းဖွင့်ကာ စုံစမ်းစစ်ဆေးမှုများ ပြလုပ်လျက်ရှိကြောင်း ၎င်းက ဆက်လက်ပြောကြား ခဲ့သည်။
“ကွယ်လွန်သူကိုတော့ နိုဝင်ဘာ (၃) ရက်နေ့ကပဲ သဂြိုလ်လိုက်ပါပြီ။ ရသေ့တောင်ရဲစခန်းက ရဲတွေကတော့ သက်သေဖြစ်နိုင်တဲ့ ဖုန်းအပါအဝင် တစ်ခြားအသုံးအဆောင်အချို့ကို သိမ်းဆည်းသွားတယ်လို့ သိရတယ်။ လက်ရှိမှာတော့ ရဲစခန်းက သေမှုသေခင်းဖွင့်ထားပြီး အခုလို ခြိမ်းခြောက်တာတွေ လုပ်ခဲ့တဲ့လူကို သိရအောင် စုံစမ်းစစ်ဆေးတာတွေလုပ်နေတယ်ဆိုပြီး မိသားစုကို အကြောင်းကြားထားတယ်လို့ သိရတယ်” ဟု ဆိုသည်။
နည်းပညာများ တိုးတက်နေသည့် ခေတ်ထဲတွင် အွန်လိုင်းမှတဆင့် ခြိမ်းခြောက်မှုများကို အရေးယူနိုင်သည့် ဥပဒေများ ပြဌာန်းထားသင့်ပြီး မိဘများအနေဖြင့်လည်း သမီးမိန်းကလေးငယ်များကို မိုဘိုင်းလ်ဖုန်း အသုံးပြမှု များအတွက် ဂရုတစိုက်ရှိသင့်သလို၊ ခြိမ်းခြောက်ခံရမှုများ ကြုံတွေ့လာရလာလျှင် မိဘများကိုဖြစ်စေ၊ ၎င်းတို့နှင့် နီးစပ်သည့် ဆွေမျိုးအသိုင်းအဝိုင်းကိုဖြစ်စေ၊ အသိပေးတိုင်ပင်ခြင်းများ ပြုလုပ်နိုင်ရန် သား၊ သမီးများကို လမ်း ညွှန်ပြောဆိုမှုများ ပြုလုပ်ထားသင့်ကြောင်း အမျိုးသမီးအရေးတက်ကြွလှုပ်ရှားသူတစ်ဦးက ပြောကြားခဲ့သည်။
“ဥပဒေကြောင်းအရလည်း အခုလိုကျူးလွန်သူတွေကို ထိုက်သင့်တဲ့ အရေးယူမှုတွေ လုပ်နိုင်ဖို့၊ ဥပဒေပြဌာန်း တာတွေလည်း ထိထိရောက်ရောက်ဖြစ်အောင် လုပ်ဆောင်သင့်ပါတယ်” ဟု ရန်ကုန်မြို့က အမျိုးသမီးအရေး တက်ကြွလှုပ်ရှားသူဖြစ်သလို ရှေ့နေအမျိုးသမီးတစ်ဦးက မှတ်ချက်ပြုပြောသည်။
ဓာတ်ပုံ – လူမှုကွန်ရက် (ပုံစာ – သေဆုံးသူအမျိုးသမီးငယ်ရေးသားခဲ့သည့် သေတမ်းစာကို တွေ့ရစဉ်)