ကလေးလေဆိပ်ဒရုန်းဖြင့်တိုက်ခိုက်ခံရပြီးနောက် လေဆိပ်ကိုအရေးပေါ်ပိတ်

စစ်ကိုင်းတိုင်း၊ကလေးမြို့လေဆိပ်ကို ဒရုန်းဖြင့်တိုက်ခိုက်ခံရပြီးနောက် လေယာဉ်ခရီးစဉ်များ ရက်အကန့်အသတ်မရှိ ရပ်ဆိုင်းထားကြောင်း ကလေးမြို့ခံနှင့် လက်မှတ်အရောင်းကိုယ်စားလှယ်များကပြောသည်။

ကလေးမြို့လေဆိပ်တွင် နိုဝင်ဘာ ၂၁ရက်(ယမန့်နေ့) နံနက် ၆နာရီခန့်က ပေါက်ကွဲဖြစ်ပွားခဲ့ပြီးနောက် စစ်​ကောင်စီကလေဆိပ်ကို ရက်အကန့်အသတ်မရှိ ပိတ်ပင်လိုက်ခြင်းဖြစ်သည်။

“လေယာဉ်ပြေးလမ်းမှာ ပေါက်ကွဲမှုဖြစ်တယ်။ ဒရုန်းနဲ့ ဗုံးသီးချခံရတယ်လို့ပြောတယ်။ လူထိခိုက်တာတော့မရှိဘူး။ လေဆိပ်ကိုတော့ မနေ့ကစပြီးအရေးပေါ်ပိတ်လိုက်တယ်”ဟု ကလေးလေဆိပ်နှင့်ပတ်သတ်သည့် သတင်းအရင်းမြစ်တစ်ခုကပြောသည်။

မည်သူက ၊မည်သည့်အဖွဲ့က ဒရုန်းဖြင့်တိုက်ခိုက်သည်ကိုမူ မသိရ​ပေ။

လေယာဉ်လက်မှတ်အရောင်းဆိုင်များက လက်မှတ်ဝယ်ယူထားသူများကို လက်မှတ်အစားထိုးပြန်လည်ပေးအပ်မည်ဖြစ်ကြောင်းနှင့် လေယာဉ်ခရီးစဉ်အသစ်အတွက်လက်မှတ်ရောင်းချခြင်းများကို ရပ်တန့်ထားရသည်ဟု လေယာဉ်လက်မှတ်အရောင်းဆိုင်မန်နေဂျာတစ်ဦးကပြောသည်။

“ကလေးလေဆိပ် ယာယီပိတ်ထားပါတယ်။ ဘယ်လေကြောင်းမှ ထွက်ခွာ/ဆိုက်ရောက် မရသေးပါဘူး။ လက်မှတ်ထုတ်ထားတဲ့ ခရီးသည်များ Refund (ငွေပြန်ထုတ်ရန်)အတွက် ဆက်သွယ်နိုင်ပါတယ်”ဟု လေယာဉ်လက်မှတ်ရောင်းအရောင်းကိုယ်စားလှယ်တစ်ဦးကပြောသည်။

စစ်ကောင်စီပြောခွင့်ရ ဗိုလ်ချုပ်ဇော်မင်းထွန်းက စစ်ကိုင်းတိုင်း၊ ကလေးလေဆိပ်ကို ဒရုန်းဖြင့် တိုက်ခိုက်ခံရကြောင်းနှင့် ထိုသို့ ဒရုန်းဖြင့် ဗုံးသီးချတိုက်ခိုက်မှုကြောင့် လေယာဉ်ပြေးလမ်းပျက်စီးသွားသည်ဟု ဝန်ခံထားကြောင်း စစ်ကောင်စီဝါဒဖြန့် တယ်လီဂရန် ချန်နယ်လ်များတွင်ဖော်ပြထားသည်။

ကလေးလေဆိပ်ဒရုန်းဖြင့်တိုက်ခိုက်ခံရပြီးနောက် လေဆိပ်ကိုအရေးပေါ်ပိတ်

ကလေးမြို့ လေဆိပ် ပေါက်ကွဲမှုဖြစ်လို့ လေယာဥ်ခရီးစဥ်တွေ ယာယီရပ်နားထား

စစ်ကိုင်းတိုင်း ၊ ကလေးခရိုင် ၊ ကလေးမြို့ ၊ ကလေး လေဆိပ်မှာ ဒီကနေ့ မနက်ပိုင်းက ပေါက်ကွဲမှုတခုဖြစ်ပွားပြီးနောက် လေယာဥ်ခရီးစဥ်တွေ ယာယီရပ်နားထားတယ်လို့ လေယာဥ်လက်မှတ် အေဂျင်စီတွေဆီက သိရပါတယ်။

အဲ့ဒီ ဖြစ်စဥ်နဲ့ ပတ်သက်ပြီး ကလေးခရိုင် လုံခြုံရေးအဖွဲ့နဲ့ နီးစပ်သူတယောက်က ” ဒီမနက် ၁၀ / ၄၅ လောက်ကဖြစ်တာပါ ၊ လေယာဥ်ပြေးလမ်းထိပ်နေရာကို ဒရုန်းဗုံးကျပြီး ပေါက်ကွဲတယ် ၊ ပျက်စီးထိခိုက်မှုကတော့ လမ်းအစွန်နေရာမှာ ခြောက်လက်မ ပတ်လည်လောက် ပျက်စီးသွားတယ် ၊ မန္တလေး လေဆိပ်ကနေ ကလေးလေဆိပ်ကိုဆင်းမယ့် လေယာဥ်ဟာ မုံရွာ လေဆိပ်ကနေ မန္တလေးကို လှည့်ပြန်သွားတယ် ၊ ကလေးမြို့မှာ မဆင်းတော့ဘူး ” လို့ ပြောပါတယ်။

ဒါ့အပြင် လေယာဥ်လက်မှတ် အရောင်းကိုယ်စားလှယ် အေဂျင်စီ တယောက်က ” ကလေးမြို့ လေကြောင်းလိုင်း ပိတ်တယ်လို့တော့ မပြောဘူး ၊ လတ်တလော တရက် ၊ နှစ်ရက်လောက်တော့ လေယာဥ် ကန်ဆယ် ဖြစ်မယ်လို့တော့ လေကြောင်းလိုင်းက ပြောတယ် ၊ လေယာဥ် ပိတ်မယ် ၊ မပိတ်ဘူးဆိုတာ သေချာပေါက် မပြောသေးဘူး ” လို့ ပြောပါတယ်။

ဒီကနေ့ လေယာဥ်ပတ်နဲ့ ကလေးမြို့ကနေ မန္တလေးကို လိုက်ပါမယ့် ကလေးမြို့ခံ ခရီးသည် တယောက်က ” ဒီနေ့ လေယာဥ်ပတ်နဲ့ လိုက်မယ် ၊ လုံခြုံရေးအရ ခရီးစဥ်ပျက်သွားတယ် ၊ ဝယ်ထားပြီးသား လက်မှတ်နဲ့ ပတ်သက်လို့ ငွေပြန်အမ်းပေးတာမျိုး အခုချိန်ထိတော့ မရှိသေးဘူး ၊ ဝယ်ထားပြီး လက်မှတ်တွေကို ပြန်ပြေးဆွဲပေးရက်ကြရင် ပြန်အသုံးပြုဖို့ စီစဥ်ပေးမယ် ” လို့ ပြောပါတယ်။

ကလေးဆိပ်မှာ ဒီကနေ့ပေါက်ကွဲမှုဖြစ်လို့ လေယာဥ်ခရီးစဥ်တွေ ယာယီရပ်နားထားမယ်လို့ သိရပြီး ဘယ်တော့ ပြန်ပြေးဆွဲမလည်းဆိုတာ VOM က မသိရသေးပါဘူး။

ပြီးခဲ့တဲ့ နှစ်စပိုင်းတုန်းက ကယားပြည်နယ် လွိုင်ကော် လေဆိပ်မှာ ဆင်းလာတဲ့ ခရီးသည်တင် လေယာဥ်တစီး သေနတ်နဲ့ချောင်းမြှောင်း ပစ်ခံရလို့ လေယာဥ်ခရီးသည် နှစ်ယောက် ကျည်ဆံထိမှန် ဒဏ်ရာရတာ ဖြစ်တယ်လို့ သိရပါတယ်။