ရန်ကုန်မှာ ပေါက်ကွဲမှုတွေဖြစ်ပြီး ၁၀ ဦးထက်မနည်းဒဏ်ရာရ

ရန်ကုန်မှာ မနေ့ညပိုင်းက မြို့နယ် ၇ မြို့နယ် မှာပေါက်ကွဲမှုတွေ ဆက်တိုက်ဖြစ်ပွားပြီး ၁၀ ဦးထက်မနည်း ထိခိုက်ဒဏ်ရာရခဲ့တယ်လို့ စုံစမ်းသိရပါတယ်။

ပေါက်ကွဲမှုတွေဟာ မင်္ဂလာဒုံ ၊ အလုံ ၊ တာမွေ ၊ဒေါပုံ ၊ တောင်ဒဂုံ ၊ဒဂုံဆိပ်ကမ်း ၊ ဒလမြို့နယ်တွေမှာဖြစ်ပွားခဲ့တာပါ။

မင်္ဂလာဒုံမြို့နယ်အတွင်းမှာဆိုရင် ည ၆ နာရီခွဲဝန်းကျင်ကနေ ည ၈ နာရီအတွင်း ပေါက်ကွဲမှု ၃ ကြိမ် ဖြစ်ပွားခဲ့ပါတယ်။ မင်္ဂလာဒုံမြို့နယ် ရန်ကုန် − ပြည်လမ်းဘေးက ပန်းခြံကုန်း ကားမှတ်တိုင် ၊ အ.ထ .က ( ၄ ) ကျောင်းရှေ့ နဲ့ အမှတ် ၃ လမ်းမတို့မှာပေါက်ကွဲမှုတွေဖြစ်တာလို့သိရပါတယ်။

မင်္ဂလာဒုံမြို့နယ်ထဲက ပေါက်ကွဲမှုတွေမှာတော့ ၇ ဦး ဒဏ်ရာရခဲ့ပါတယ်။ အလုံမြို့နယ် ၊အောက်ကြည့်မြင်တိုင်လမ်းပေါ်က ဆောက်လုပ်ဆဲ Best Western Hotel မှာ မနေ့ညပိုင်း ၇ နာရီခွဲခန့်က ဖြစ်ပွားတဲ့ပေါက်ကွဲမှုလည်း ပြင်းထန်ပြီး လူ ၅ ဦးဒဏ်ရာရခဲ့တယ်လို့ စုံစမ်းသိရပါတယ်။

ဒါအပြင် တာမွေမြို့နယ် ၊ ကျိုက္ကဆံလမ်း ၁၅၄ လမ်းနဲ့ ၁၅၅ လမ်းကြား ၊ ဒေါပုံမြို့နယ် ကြည်စုရပ်ကွက် ၊ တောင်ဒဂုံမြို့နယ် ၂၄ ရပ်ကွက် ၊ ဒဂုံဆိပ်ကမ်းမြို့နယ် ၉၂ ရပ်ကွက်၊ ဒလမြို့နယ်. ဗိုလ်ရန်ပြေရပ်ကွက်တွေမှာလည်း ည ၆ နာရီခွဲကနေ ည ၉ နာရီအတွင်း ပေါက်ကွဲမှုတွေ ဖြစ်ပွားခဲ့ပါတယ်။

အဲဒီပေါက်ကွဲမှုတွေအကြောင်းနဲ့ထိခိုက်ဒဏ်ရာရသူတွေရဲ့ အနီးကပ်ဓာတ်ပုံတွေကို စစ်ကောင်စီအာဘော်တယ်လီဂရမ်အချို့မှာ ဖော်ပြလာကြတာလည်းတွေ့ရပါတယ်။

မနေ့ညပိုင်းက ဖြစ်ပွားတဲ့ ပေါက်ကွဲမှုအများစု ဟာ လမ်းဘေး တမင်ချထားတဲ့ Bluetooth ဆောင်းဘောက်စ် တွေထဲ ထည့်ထားတဲ့ ဗုံးပေါက်ကွဲတာလို့ စစ်ကောင်စီဘက်က ဝါဒဖြန့်ထားပါတယ်။

အခုလို ပေါက်ကွဲမှုတွေမဖြစ်ခင်ကတော့ ရန်ကုန်မှာ စစ်ကောင်စီတပ်ဟာ သံချပ်ကာကားတွေ ၊အထူးတပ်ဖွဲ့ဝင်တွေ ညပိုင်းကင်းလှည့်ပြီး အင်အားပြတာမျိုး လုပ်ခဲ့ပါတယ်။