စစ်ကောင်စီ လေကြောင်းပစ်ကူသုံး ခုခံ
ကချင်ပြည်နယ် ဖားကန့်မြို့နယ်ရှိ တာမခံကျေးရွာ စစ်ကောင်စီတပ်စခန်းကို ကချင် လွတ်လပ်ရေးတပ်မတော်(KIA)ပူးပေါင်းတပ်ဖွဲ့က ယနေ့ညနေပိုင်း၌ စတင်ထိုးစစ်ဆင်၍ တိုက်ပွဲပြင်းထန်နေသည်ဟု ဒေသခံက ပြောသည်။
” အဲဒီက ၄နာရီကတည်းကနေ တာဝန် စခန်းကုန်းကို ဒီဘက်ကသိမ်းနေတာ မပြီးသေးပါဘူး။ အခုလောလောဆယ် အဲဒီမှာ ဖိုက်တာ နှစ်စီးနဲ့လာကြဲတယ်။ အခြေအနေကတော့ ပွဲမပြီးသေးတော့ ပြောလို့မရသေးဘူး”ဟု ဒေသခံက ပြောသည်။
စခန်းသိမ်းတိုက်ခိုက်မှုကို KIAနှင့် အတူ ကချင်ဒေသ ပြည်သူ့ကာကွယ်ရေးတပ်(KPDF) တို့ ပူးပေါင်းဆောင်ရွက်နေခြင်း ဖြစ်သည်။
KIA အနေဖြင့် ပြီးခဲ့သည့် ရက်ပိုင်းကလည်း မြစ်ကြီးနားမြို့နယ် ဆင်ဘိုမြို့အနီးရှိ စစ်ကောင်စီ၏ ခလရ(၁၄၁)ကို သိမ်းပိုက်နိုင်ရေး ထိုးစစ်ဆင်လျက်ရှိသည်။
ယခု နှစ်ဆန်းပိုင်းတွင် ဖားကန့်မြို့နယ်အပါအဝင် ကချင်ဒေသရှိ စစ်ကောင်စီစခန်းများကို KIAက တိုက်ခိုက်သိမ်းပိုက်မှု အရှိန်မြှင့်ဆောင်ရွက်လျက်ရှိပြီး ဖားကန့် ဝှေခါ တပ်စခန်း၊ ရဲစခန်း၊ နမ့်တိန်း တပ်စခန်းများကို သိမ်းပိုက်ထားသည်။
Leave a Reply