စစ်တပ်ဒေါက်တိုင် တေဇ၏ သမီး ရေချယ်တေဇ အီတလီ နိုင်ငံအတွင်း နေထိုင်နေမှုကို ဖယ်ရှားရန်နှင့် ပိုင်ဆိုင်မှုများ သိမ်းယူရန် JFM က အီတလီအာဏာပိုင်များကို တိုင်ကြား

မြန်မာနိုင်ငံမှ အကြမ်းဖက်စစ်တပ်၏ ဒေါက်တိုင် တေဇ ၏ သမီးဖြစ်သူ ရေချယ်တေဇ ကို အီတလီနိုင်ငံမှ ပြောင်းရွှေ့ဖယ် ရှားရန်နှင့် ပိုင်ဆိုင်မှုများကို ထိန်းသိမ်းရန် Justice For Myanmar(JFM) က အီတလီ အာဏာပိုင်များထံ သတင်းပေး တိုင်ကြားလိုက်သည်။

ရေချယ်တေဇ (ခေါ်) ထူးထွေးတေဇသည် အီးယူက ဒဏ်ခတ် ပိတ်ဆို့မှုများ ချမှတ်ထားသည့် ထူးကုမ္ပဏီအုပ်စုဝင် ကုမ္ပဏီများတွင် ဒါရိုက်တာနှင့် ရှယ်ယာရှင်အဖြစ် ပါဝင်နေမှုအပေါ် စုံစမ်းစစ်ဆေးရန်၊ လိုအပ်သလို ပိုင်ဆိုင်ပစ္စည်းများကို ထိန်းသိမ်းထားရန်နှင့် ၎င်းကို အီတလီနိုင်ငံမှ ပြောင်းရွှေ့ဖယ်ရှားရန် အတွက် ပြင်သစ်ရှေ့နေများ ဖြစ်ကြသည့် William Bourdon နှင့် Lily Ravon တို့က Justice For Myanmar ကိုယ်စားပြု၍ အီတလီ အာဏာပိုင်များထံ ၂၀၂၄ ခုနှစ်၊ မတ်လ ၄ ရက်နေ့တွင် သတင်းပေးတိုင်ကြားခြင်းဖြစ်ကြောင်း သိရှိရသည်။

ရေချယ်တေဇသည် အီတလီနိုင်ငံတွင် ဆက်လက် နေထိုင်လျက်ရှိပြီး အီးယူက ဒဏ်ခတ်ပိတ်ဆို့မှု ချမှတ်ထားသော ၎င်း၏ မိသားစုပိုင် ခရိုနီစီးပွားရေး လုပ်ငန်းစုကြီးဖြစ်သည့် ထူးကုမ္ပဏီအုပ်စုအတွက် စီးပွားရေးလုပ်ငန်းများကို ဆက်လက် ဆောင်ရွက်လျက်ရှိကြောင်း၊ ထူးကုမ္ပဏီအုပ်စုသည် မြန်မာစစ်အုပ်စုအတွက် ဘဏ္ဍာငွေ စစ်လက်နက်နှင့် ဆက်စပ်ပစ္စည်းများ ပေးအပ်လျက် ရှိပြီး လူမျိုးတုန်းသတ်ဖြတ်မှု စစ်ရာဇဝတ်မှုများနှင့် လူသားမျိုးနွယ်အပေါ် ကျူးလွန်သည့် ရာဇဝတ်မှုများကို အားပေး ကူညီလျက်ရှိသည့် အကြမ်းဖက် စစ်တပ်၏ နိုင်ငံတကာ စီးပွားရေးကွန်ရက်တွင် အရေးပါသည့် ဆက်ထုံးကုမ္ပဏီ တစ်ခုလည်း ဖြစ်ကြောင်း သိရှိရသည်။

ထိုသို့ ကြားခံဆက်ထုံး ဆောင်ရွက်မှုများကို မြန်မာနိုင်ငံနှင့် စင်ကာပူနိုင်ငံတို့ရှိ ဓာတ်သတ္တု တူးဖော်ထုတ်ယူရေး ကဏ္ဍအပါအဝင် စီးပွားရေး နယ်ပယ်ကဏ္ဍအသီးသီးရှိ ကုမ္ပဏီလုပ်ငန်းပေါင်း ၆၀ ကျော်သည် ၎င်းတို့၏ ကွန်ရက်မှတဆင့် ဆောင်ရွက်ခြင်း ဖြစ်ကြောင်း၊ ထူးကုမ္ပဏီအုပ်စုကို အမေရိကန်ပြည်ထောင်စု ယူကေနှင့် ကနေဒါနိုင်ငံတို့ကလည်း ဒဏ်ခတ်ပိတ်ဆို့မှုများ ချမှတ် ထားကြောင်း သိရသည်။

“ထူးကုမ္ပဏီများ အုပ်စုသည် နိုင်ငံတဝန်းလုံး အထူးသဖြင့် လူနည်းစု လူမျိုးစု ဒေသများမှ ဖေဖော်ဝါရီ ၁ ရက်နေ့ စစ်အာဏာသိမ်းမှုအပေါ် ဆန့်ကျင်ခဲ့ကြသည့် အရပ်သားပြည်သူများ အပေါ် အသုံးပြုခဲ့သည့် စစ်ဘက်ဆိုင်ရာပစ္စည်းများ ထောက်ပံ့ဖြည့်တင်း ပေးခဲ့မှုများတွင် ကြားခံပွဲစားအဖြစ် ဆောင်ရွက်ခဲ့သည်” ဟု အီးယူ ၏ ဒဏ်ခတ်ပိတ်ဆို့မှု ချမှတ်ရခြင်း အကြောင်းအရင်းများတွင် ဖော်ပြထားသည်။

ပြင်သစ်ရှေ့နေများ ဖြစ်ကြသည့် William Bourdon နှင့် Lily Ravon တို့သည် ရေချယ်တေဇ အသုံးပြုသည့် Banca Nazionale del Lavoro ဘဏ်ကိုလည်း အီးယူ ဒဏ်ခတ်ပိတ်ဆို့မှုများနှင့်အညီ အရေးယူဆောင်ရွက်ပေးရန် အမှုတွဲဖိုင် တစ်ခု တင်သွင်းခဲ့ပြီး ယင်းဘဏ်ကို BNP Paribas က ပိုင်ဆိုင်ကြောင်း သိရသည်။

ရေချယ်တေဇသည် မီလန်မြို့တွင် နေထိုင်လျက်ရှိပြီး မကြာသေးမီကမှ ယင်းမြို့ရှိ ဖက်ရှင် သင်တန်းကျောင်းမှ ကျောင်းပြီးခဲ့ခြင်းဖြစ်ကြောင်း၊ ထူးကုမ္ပဏီများအုပ်စုမှ အမြတ်အစွန်းများဖြင့် ကျောင်းတက်ခဲ့ခြင်း ဖြစ်ကြောင်း Justice For Myanmar က ဆိုသည်။

ရေချယ်သည် အီတလီတွင်ရှိနေစဉ်ေ စစ်တပ်၏ အာဏာသိမ်း ကြိုးပမ်းမှုနောက်ပိုင်းတွင်မှ တည်ထောင်ခဲ့သည့် ကုမ္ပဏီအသစ်များနှင့် မြန်မာစစ်တပ်နှင့် တိုက်ရိုက် စီးပွားရေးလုပ်ငန်းများရှိသည့် ကုမ္ပဏီများအပါအဝင် အနည်းဆုံး ထူးအုပ်စု ကုမ္ပဏီ ၇ ခုတွင် ဒါရိုက်တာအဖြစ် ဆောင်ရွက်လျက်ရှိပြီး ရှယ်ယာများလည်း ဆက်လက် ပိုင်ဆိုင်ထားကြောင်း သိရှိရသည်။

အီးယူ၏ ဒဏ်ခတ်ပိတ်ဆို့မှု ချမှတ်ခံထားရသည့် မြန်မာစစ်တပ်၏ စစ်ထောက်ချုပ်ရုံးနှင့် တည်ဆောက်-လုပ် ကိုင်-လွှဲပြောင်း (ဘီအိုတီ) သဘောတူစာချုပ်ဖြင့် လုပ်ကိုင်သော Ayeyarwaddy Resorts and Lodges Company Limited လည်း ပါဝင်ကြောင်း၊ ၎င်းတို့၏ စီမံကိန်းများမှ တစ်ခုသည် ရန်ကုန်ရှိ မြေဧရိယာ ၂၂ ဧကပေါ်တွင် ဆောင်ရွက်သော စီးပွားရေးဆိုင်ရာစီမံကိန်းဖြစ်ပြီး၊ ယင်းစီမံကိန်းသည် နှစ် ၅၀ လုပ်ကိုင်ခွင့်စာချုပ်အရ နှစ်စဉ် အမေရိကန်ဒေါ်လာ ၁.၆၅ သန်းနီးပါး စစ်တပ်အား ပေးချေရကြောင်း Distributed Denial of Secrets (DDoS) က ထုတ်ပြန်ခဲ့သည့် မြန်မာ့ရင်းနှီးမြှုပ်နှံမှုကော်မရှင် အချက်အလက်များအရ သိရသည်။

အီတလီနိုင်ငံတွင် နေ၍ မြန်မာပြည်မှ ရှယ်ယာပိုင်ဆိုင်ထားပြီး ဒါရိုက်တာအဖြစ်ဆောင်ရွက်နေသည့် ရေချယ်တေဇ၏ အခြားကုမ္ပဏီ များမှာ Htoo Capital ကုမ္ပဏီလီမိတက်၏ ကုမ္ပဏီခွဲ Pegu Wood Company Limited နှင့် Htoo Tech Company Limited ၏ ကုမ္ပဏီခွဲ One Fibre Company Limited တို့ ဖြစ်ပြီး ယင်းကုမ္ပဏီ ၂ ခုလုံးသည် အကြမ်းဖက် စစ်တပ်၏ တရားမဝင် အာဏာသိမ်းကြိုးပမ်းမှုနောက်ပိုင်းတွင် တည်ထောင်ခဲ့ခြင်း ဖြစ်ကြောင်း၊ ထို့ပြင် ရေချယ်တေဇသည် ဖျက်သိမ်းခဲ့ပြီးဖြစ်သည့် Myanmar Avia Export Company Limited တွင်လည်း ဒါရိုက်တာနှင့် ရှယ်ယာရှင် ၁ ဦး ဖြစ်ခဲ့ပြီး ယင်းကုမ္ပဏီသည် အကြမ်းဖက် မြန်မာ စစ်တပ်အတွက် ရုရှား စစ်လေယာဉ်များနှင့် အပိုပစ္စည်းများ တင်သွင်းထောက်ပံ့သည့် စစ်လက်နက်ပွဲစား ကုမ္ပဏီတစ်ခု ဖြစ်ကြောင်း သိရှိရသည်။

အမေရိကန်ပြည်ထောင်စုက ရေချယ်တေဇကို ၂၀၂၃ ခုနှစ်၊ ဇန်နဝါရီလ ၃၁ ရက်နေ့တွင် ဒဏ်ခတ်ပိတ်ဆို့ မှုများ ချမှတ်ခဲ့ကြောင်း၊ ဖခင် တေဇကိုမူ အီးယူ၊ အမေရိကန်ပြည်ထောင်စု၊ ယူကေနှင့် ကနေဒါနိုင်ငံတို့က ဒဏ်ခတ် ပိတ်ဆို့မှုများ ချမှတ်ထားပြီး ရေချယ်တေဇ၏ အစ်ကိုများ ဖြစ်ကြသည့် ပြည့်ဖြိုးတေဇနှင့် ထူးထက်တေဇတို့ကိုလည်း အမေရိကန်ပြည်ထောင်စု၊ ယူကေနှင့် ကနေဒါနိုင်ငံတို့က ဒဏ်ခတ်ပိတ်ဆို့မှုများ ချမှတ်ထားကြောင်း သိရသည်။

ထူး ကုမ္ပဏီ အုပ်စုသည် စစ်လက်နက်များ ရောင်းချပေးအပ်မှုများအပြင် အကြမ်းဖက် စစ်တပ် အတွက် ရိုဟင်ဂျာ လူမျိုးတုန်းသတ်ဖြတ်မှု စစ်ဆင်ရေးကို အားပေး ထောက်ခံကူညီသည့်အနေဖြင့် ၂၀၁၇ ခုနှစ်တွင် အလှူဘဏ္ဍာငွေများ လှူဒါန်းခဲ့ကြောင်း၊ ယင်းအချက်ကို ထူး စီးပွားရေး လုပ်ငန်းစုကြီးအပေါ် အီးယူက ဒဏ်ခတ်ပိတ်ဆို့မှုချမှတ်ရာတွင် မှတ်ချက်ပြု ဖော်ပြထားကြောင်း၊ အီးယူအနေဖြင့် ရေချယ်တေဇအပါအဝင် ကုမ္ပဏီများ၊ လူပုဂ္ဂိုလ်များနှင့် စုဖွဲ့ထားသည့် ထူးအုပ်စုကွန်ရက် တစ်ခုလုံး အပေါ် ဒဏ်ခတ်ပိတ်ဆို့မှုများ ချမှတ်ရန်၊ အလားတူ မြန်မာစစ်အုပ်စု ခရိုနီများနှင့် စစ်လက်နက်ပွဲစား အားလုံးအပေါ် ဒဏ်ခတ်ပိတ်ဆို့မှုများ ချမှတ်ရန် Justice For Myanmar က တောင်းဆိုထားသည်။

“အီတလီအာဏာပိုင်တွေအနေနဲ့ ဒဏ်ခတ် ပိတ်ဆို့မှုတွေကို အသက်ဝင်လည်ပတ်အောင် ကြပ်မတ်ဆောင်ရွက်မှု အားနည်းတာတွေက ရေချယ်တေဇကို တရားမဝင်၊ ဥပဒေနဲ့မညီတဲ့ စစ်အုပ်စုအတွက် ဘဏ္ဍာငွေပေးအပ်တဲ့ စီးပွားရေးလုပ်ငန်းတွေကို အီတလီနိုင်ငံကနေ လုပ်ဆောင်နိုင်ဖို့ ခွင့်ပြုပေးခဲ့တာပဲ ဖြစ်ပါတယ်” Justice For Myanmar ၏ ပြောရေးဆိုခွင့်ရှိသူ မရတနာမောင်က ပြောဆိုသည်။

ရေချယ်တေဇနှင့် ၎င်း၏ မိသားစုများက မြန်မာစစ်တပ်၏ အဆုံးအစမဲ့ စစ်ရာဇဝတ်မှုများနှင့် လူသားမျိုးနွယ်အပေါ် ကျူးလွန်သည့် ရာဇဝတ်မှုများကို ထူးကုမ္ပဏီအုပ်စုမှ တဆင့် အားပေးကူညီခဲ့ကြောင်း၊ မြန်မာပြည်သူလူထု အသက်သွေးချွေးများပေါ်မှ အကျိုးအမြတ်များ ရရှိခဲ့ကြကြောင်း၊ ရေချယ်တေဇကို အီးယူ ဒဏ်ခတ်ပိတ်ဆို့မှုများနှင့်အညီ တရားဥပဒေရှေ့မှောက်တွင် တာဝန်ခံစေသင့်ကြောင်း၊ အီတလီ နိုင်ငံအနေဖြင့် ၎င်းအပါအဝင် အခြားမည်သည့် မြန်မာခရိုနီကိုမှ ၎င်းတို့၏ သွေးစွန်းစီးပွားရေး လုပ်ငန်းများကို အီတလီမြေပေါ်မှ မလုပ်ဆောင်နိုင်စေရေး ကြီးကြပ် ဆောင်ရွက်ရန် လိုအပ်ကြောင်း Justice For Myanmar က ပြောဆိုထားသည်။

အီးယူ အပါအဝင် အခြားအစိုးရများ အနေဖြင့် ကုမ္ပဏီကွန်ရက်တစ်ခုလုံးကို လွှမ်းခြုံနိုင်သည့် ပိုမိုအားကောင်းပြီး မဟာ ဗျူဟာကျကျ ညှိနှိုင်းဆောင်ရွက်ချမှတ်သည့် ဒဏ်ခတ် ပိတ်ဆို့မှုများနှင့် အားကောင်းခိုင်မာသည့် အရေးယူ ဆောင်ရွက်မှုများမှ တဆင့် အကြမ်းဖက် စစ်အုပ်စု၏ ဘဏ္ဍာငွေ စစ်လက်နက် ရရှိနေမှုများကို ပိတ်ဆို့နိုင်ရေး ပိုမိုလုပ်ဆောင်ရန် လိုအပ်နေကြောင်း၊ မြန်မာပြည်သူလူထုသည် အကြမ်းဖက် စစ်တပ် ကျရှုံးနေပြီဖြစ်သည့် အာဏာသိမ်းကြိုးပမ်းမှုကို သတ္တိပြောင်မြောက်စွာဖြင့် ၃ နှစ်ကျော်တိုင် ခုခံ တောင်လှန်နေကြဆဲဖြစ်ကြောင်၊ အီတလီနိုင်ငံနှင့် အီးယူတို့အနေဖြင့် လူ့အခွင့်အရေးကို လေးစားတန်ဖိုးထားပြီး တရားမျှတမှုနှင့် တာဝန်ခံမှုကို အာမခံလျက် အားလုံး ပါဝင်နိုင်သည့် မြန်မာနိုင်ငံသစ် တည်ဆောက်ရေး ကြိုးပမ်းဆောင်ရွက်နေသည့် မြန်မာပြည်သူလူထုနှင့် အတူ ရပ်တည်ရမည်ဖြစ်ကြောင်း Justice For Myanmar က တိုက်တွန်းထားသည်။

ဦးတေဇသမီး ရေချယ်တေဇကို အီတလီခြေချခွင့်မပြုရန် တောင်းဆို

အီတလီနိုင်ငံ မီလန်မြို့တွင် နေထိုင်ပြီး မကြာသေးမီက ဖက်ရှင်ကျောင်းတစ်ခုမှ ပညာသင်ယူမှုပြီး မြောက်ခဲ့သည့် ၂၈ နှစ်အရွယ် ရေချယ်တေဇသည် ဥရောပသမဂ္ဂက ပိတ်ဆို့ထားသော မိသားစုပိုင် ထူးကုမ္ပဏီအုပ်စုအတွက် အလုပ်ဆက်လုပ်နေသည်ဟု Justice For Myamar အဖွဲ့က ဆိုသည်။

အနောက်နိုင်ငံများ၏ ပိတ်ဆို့အရေးယူခြင်းခံထားရသည့် ထိပ်သီးခရိုနီသူဌေး ဦးတေဇ၏သမီးဖြစ်သူ ရေချယ်တေဇ ခေါ် ထူးထွေးတေဇကို ဥရောပသမဂ္ဂအဖွဲ့ဝင် အီတလီနိုင်ငံတွင် အခြေချခွင့်မပြုရန်နှင့် ပိုင်ဆိုင်မှုများကို ထိန်းချုပ်ရန် Justice For Myamar (JFM) အဖွဲ့က ယနေ့ (မတ် ၈) တောင်းဆိုလိုက်သည်။

ခေတ်အဆက်ဆက်တွင် စစ်ဗိုလ်ချုပ်များနှင့် နီးကပ်သူ ထူးကုမ္ပဏီအုပ်စုပိုင်ရှင် ဦးတေဇနှင့် ၎င်းပိုင်လုပ်ငန်းများကို ဥရောပသမဂ္ဂ အပါအဝင် အမေရိကန်၊ ဗြိတိန်နှင့် ကနေဒါတို့က ပိတ်ဆို့အရေးယူထားသည်။ ၁၉၈၈ နောက်ပိုင်း စစ်အစိုးရခေတ်တွင် အနောက်နိုင်ငံများ၏ ပစ်မှတ်ထားအရေးယူခံခဲ့ရသူ ဦးတေဇမှာ စစ်တပ်က တစ်ကျော့ပြန်အာဏာသိမ်းသည့် ၂၀၂၁ နောက်ပိုင်းတွင်လည်း အမေရိကန်နှင့် မဟာမိတ်နိုင်ငံများ၏ ဒဏ်ခတ်အရေးယူခြင်းခံရသည်။

အီတလီနိုင်ငံ မီလန်မြို့တွင် နေထိုင်ပြီး မကြာသေးမီက ဖက်ရှင်ကျောင်းတစ်ခုတွင် ပညာသင်ယူမှုပြီးမြောက်ခဲ့သည့် အသက် ၂၇ နှစ်အရွယ် ရေချယ်တေဇသည် ဥရောပသမဂ္ဂက ပိတ်ဆို့အရေးယူထားသော မိသားစုပိုင် ထူးကုမ္ပဏီအုပ်စုအတွက် အလုပ်ဆက်လုပ်နေသည်ဟု မြန်မာစစ်တပ်၏ လူ့ခွင့်အရေးချိုးဖောက်မှုများအကြောင်းသာမက ပတ်သက်ဆက်နွှယ်သူများကို ဖော်ထုတ်နေသည့် JFM က ဆိုသည်။

ထူးအုပ်စုတွင် ဆက်လက်ပါဝင်နေခြင်းကြောင့် ရေချယ်တေဇကို ၂၀၂၃ ဇန်နဝါရီတွင် အမေရိကန်က အရေးယူပိတ်ဆို့ထားပြီး ဖခင်ဖြစ်သူ ဦးတေဇနှင့် အစ်ကိုများဖြစ်သည့် ပြည့်ဖြိုးတေဇ၊ ထူးထက်တေဇတို့ကို အမေရိကန်၊ ဗြိတိန်နှင့် ကနေဒါတို့က ပိတ်ဆို့အရေးယူထားသည်။

မိသားစုပိုင် ထူးကုမ္ပဏီအုပ်စုကို ဥရောပသမဂ္ဂက အရေးယူပိတ်ဆို့ထားရာ ရေချယ်တေဇကိုလည်း အရေးယူသင့်ပြီး အီတလီမြေပေါ်တွင် ခရိုနီကြီးများ၏ သွေးစွန်းစီပွားရေးလုပ်ငန်းများကို မရှိစေရန် လိုအပ်သည်ဟု JFM အဖွဲ့ ပြောရေးဆိုခွင့်ရှိသူ မရတနာမောင်က ဆိုသည်။

“အီတလီအာဏာပိုင်တွေရဲ့ ပိတ်ဆို့မှုပိုင်းဆိုင်ရာ အားနည်းချက်ကြောင့် အာဏာသိမ်းစစ်ကောင်စီကို တရားဝင်နှင့် တရားမဝင်ငွေကြေးထောက်ပံ့နိုင်ဖို့ အီတလီနိုင်ငံမှာ ရေချယ်တေဇကို စီးပွားရေးလုပ်ဖို့ ခွင့်ပြုထားပါတယ်” ဟု ၎င်းက ပြောသည်။

ထူးကုမ္ပဏီအုပ်စုတွင် ပါဝင်လုပ်ကိုင်နေခြင်းနှင့် ဥရောပသမဂ္ဂအဖွဲ့ဝင် အီတလီနိုင်ငံတွင် အခြေချနေထိုင်ခွင့်မပြုရန် တောင်းဆိုခံရမှုအပေါ် ဦးတေဇသမီး ရေချယ်တေဇကို Myanmar Now က အီးမေးလ်ဖြင့် ဆက်သွယ်မေးမြန်းခဲ့သော်လည်း တစ်စုံတစ်ရာ တုံ့ပြန်ပြောဆိုခြင်း မရှိပေ။

ရေချယ်တေဇအပါအဝင် ထူးအုပ်စုနှင့် ဆက်နွှယ်သည့် ကုမ္ပဏီနှင့် လူပုဂ္ဂိုလ်အပြင် မြန်မာစစ်တပ်အတွက် လက်နက်ဝယ်ပေးသည့် ပွဲစားများနှင့် ခရိုနီလုပ်ငန်းများကို အရေးယူပိတ်ဆို့ရန် တောင်းဆိုသည်ဟုလည်း မရတနာမောင်က ပြောသည်။

ရေချယ်တေဇနှင့် သူ၏မိသားစုသည် စီးပွားရေးအကျိုးအမြတ်များမှတစ်ဆင့် မြန်မာစစ်တပ်၏ အဆုံးမရှိသော စစ်ရာဇဝတ်မှုနှင့် လူသားမျိုးနွယ်အပေါ် ကျူးလွန်သည့် ရာဇဝတ်မှုများကို ကာလရှည်ကြာ အားပေးကူညီရာရောက်နေသည်ဟု ၎င်းက ထေက်ပြသည်။

သယံဇတတူးဖော်ရေးနှင့် အခြားစီပွားရေးလုပ်ငန်းများစွာလုပ်ကိုင်နေသည့် ထူးအုပ်စုသည် မြန်မာနှင့် စင်ကာပူတွင် လုပ်ငန်းပေါင်း ၆၀ ထက်မနည်းရှိနေသည်။ ဥရောပသမဂ္ဂ၏ အရေးယူပိတ်ဆို့ကြောင်း ထုတ်ပြန်ချက်တွင် အာဏာသိမ်းပြီးနောက် စစ်တပ်က အရပ်သားများကို ဖြိုခွင်းတိုက်ခိုက်ရန် ထူးကုမ္ပဏီက စစ်လက်နက်ကိရိယာများ ကြားခံပံ့ပိုးပေးခဲ့သည်ဟု ဖော်ပြသည်။

ရေချယ်တေဇအနေဖြင့် အာဏာသိမ်းပြီးနောက် စစ်တပ်နှင့် ပူးပေါင်းသည့် လုပ်ငန်းသစ်တစ်ခုအပါအဝင် အနည်းဆုံး ထူးအုပ်စုဝင်ကုမ္ပဏီ ၇ ခုတွင် ဒါရိုက်တာနှင့် ရှယ်ယာရှင်အဖြစ် ဆက်လက်ပါဝင်နေသည်ဟု JFM က အခိုင်အမာပြောသည်။

ထိုကုမ္ပဏီများအနက် Ayeyarwaddy Resorts and Lodges Company Limited သည် ဥရောပသမဂ္ဂက ပိတ်ဆို့ထားသည့် စစ်တပ်ပိုင် စစ်ထောက်ချုပ်ရုံး မြေနေရာပေါ်တွင် BOT စနစ် (တည်ဆောက်၊ လုပ်ကိုင်၊ လွှဲပြောင်း) စနစ်ဖြင့်အကောင်အထည်ဖော်နေသည့် စီပွားရေးစီမံကိန်းတွင် ပါဝင်နေသည်။

ရန်ကုန်ရှိ မြေ ၂၂ ဧကပေါ်တွင် နှစ် ၅၀ စာချုပ်ဖြင့် မြေငှားရမ်းအသုံးပြုခအတွက် စစ်တပ်ကို နှစ်စဉ် အမေရိကန်ဒေါ်လာ ၁ ဒသမ ၆၅ သန်း ပေးချေရမည့် စီမံကိန်းတစ်ခုဖြစ်ကြောင်း ပေါက်ကြားလာသည့် ရင်းနှီးမြှုပ်နှံမှုဆိုင်ရာအချက်လက်များကို ကိုးကား၍ JFM ထုတ်ပြန်ချက်တွင် ဖော်ပြသည်။

ထို့ပြင် ရေချယ်တေဇသည် ထူးအုပ်စု၏ လက်အောက်ခံ One Fibre Company Limited နှင့် Pegu Wood Company Limited တို့တွင် ရှယ်ယာရှင်ဖြစ်သလို အီတလီမှနေ၍ ဒါရိုက်တာအဖြစ် လုပ်ကိုင်နေသည်။ စစ်တပ်အတွက် ရုရှားထုတ် စစ်လေယာဉ်နှင့် အစိတ်အပိုင်းများဝယ်ယူပေးခဲ့ပြီး မကြာသေးမီက ဖျက်သိမ်းလိုက်သည့် Avia Export Company Limited တွင်လည်း ဒါရိုက်တာနှင့် ရှယ်ယာရှင်အဖြစ် ပါဝင်သည်ဟု ဆိုသည်။

ဥရောပသမဂ္ဂက အရေးယူထားသည့် ထူးလုပ်ငန်းစုပိုင် ကုမ္ပဏီများတွင် ရေချယ်တေဇသည် အစုရှယ်ယာရှင်နှင့် ဒါရိုက်တာအဖြစ် ပါဝင်နေမှုကို စုံစမ်းစစ်ဆေးပေးရန် JFM ၏တောင်းဆိုချက်နှင့် ပတ်သက်၍ ပြင်သစ်ရှေ့နေ William Bourdon နှင့် Lily Ravon တို့က အီတလီအစိုးရအာဏာပိုင်များကို တိုင်ကြားထားသည်။

ထို့ပြင် အီတလီတွင် နေထိုင်ကာ ကျောင်းတက်နေသည့် ရေချယ်တေဇ၏ အသုံးစရိတ်များအတွက် ထူးကုမ္ပဏီက ငွေကြေးထောက်ပံ့ပေးရာတွင် ဥရောပသမဂ္ဂအဖွဲ့ဝင် ပြင်သစ်မှ BNP Paribas ၏ လက်အောက်ခံ အီတလီဘဏ် Banca Nazionale del Lavoro ဘဏ်စာရင်းအသုံးပြုနေခြင်းကိုလည်း အီးယူ၏ အရေးယူပိတ်ဆို့မှုများနှင့် ကိုက်ညီမှုရှိမရှိ စစ်ဆေးရန် ပြင်သစ်ရှေ့နေနှစ်ဦးက တိုင်ကြားသည်။

ရေချယ်တေဇသည် ပေါ့ပ်အဆိုတော်တစ်ဦးအဖြစ် ၂၀၁၉ တွင် “ကမ္ဘာ” တေးသီချင်းအယ်ဘမ်ကို ထုတ်ဝေဖြန့်ချိခဲ့ပြီး YouTube တွင် ကြည့်ရှုသူ သန်းချီသည့် တေးသီချင်းဗီဒီယိုများထုတ်လုပ်ဖြန့်ချိရန် ဖြစ်လာခဲ့သည်။ ထို့ပြင် နာမည်ကျော် မဂ္ဂဇင်းတစ်စောင်ဖြစ်သည့် Vouge Italia က ရေချယ်တေဇကို မော်ဒယ်အနေဖြင့် ရေးသားဖော်ပြဖူးသည်။

ဖခင်ဖြစ်သူ ဦးတေဇကမူ အရပ်သားအစိုးရကို ဖြတ်ချကာ စစ်တပ်အာဏာသိမ်းသည့် ၂၀၂၁ ကတည်းက စင်ကာပူနိုင်ငံတွင် နေထိုင်နေသည်။

Comments

Leave a Reply Cancel reply