သတ်မှတ်စျေးနှုန်းဖြင့်သာ ရောင်းရန် ဖိအားပေးခံနေရသဖြင့် စျေးသည်များအခက်တွေ့

စစ်တပ်လက်အောက်ခံ စည်ပင်သာယာစျေးများတွင် ကြက်သား၊ ဝက်သား၊ အမဲသားနှင့်ဆိပ်သားများကို သတ်မှတ်စျေးနှုန်းဖြင့်သာ ရောင်းရန် ဖိအားပေးခံနေရသဖြင့် စျေးသည်များအခက်တွေ့

အကြမ်းဖက်စစ်တပ်လက်အောက်ခံ စည်ပင်သာယာစျေးများတွင် ကြက်သား၊ ဝက်သား၊ အမဲသားနှင့်ဆိပ်သားများကို သတ်မှတ်စျေးနှုန်းဖြင့်သာ ရောင်းရန် ဖိအားပေးခံနေရသဖြင့် စျေးသည်များအခက်တွေ့ နေကြောင်း စျေးသည်များက ပြောဆိုသည်။

မကွေးတိုင်းအတွင်းရှိ စစ်ကောင်စီလက်အောက်ခံ စည်ပင်သာယာရေးစျေးများအားလုံးတွင် ကြက်သား၊ ဝက်သား၊ အမဲသားနှင့် ဆိတ်သားများကို သတ်မှတ်စျေးဖြင့် ရောင်းရန် စျေးသည်များကို ဖိအားပေးလာခြင်းဖြစ်ကြောင်း၊ သတ်မှတ်စျေးဖြင့် မရောင်းပါက စျေးရောင်းချခွင့် ပိတ်ပင်မည့်အပြင် ဒဏ်ရိုက်ခြင်း၊ ထောင်ချခြင်းများပါ ဆောင်ရွက်မည်ဟု ပြောဆိုလာကြောင်း သိရှိရသည်။

“ကြက်သား၊ဝက်သား၊ အမဲသားနဲ့ ဆိပ်သားတွေကို တစ်ပိဿာ တစ်သောင်းနဲ့ တစ်သောင်းခွဲအတွင်းပဲ ရောင်းရမယ်။ အဲဒါထက်ကျော်ရောင်းတာ။ အရိုးရောတာတွေကို စျေးရောင်းချခွင့် ပိတ်မယ့်အပြင် ဒဏ်ရိုက်၊ ထောင်ချမယ်လို့ ခြိမ်းခြောက်တယ်။ သူတို့သတ်မှတ်တဲ့စျေးနဲ့ မရောင်းနိုင်ရင် စျေးလာမရောင်းနဲ့ပေါ့ အဲဒီလို ပြောတယ်” ဟု နတ်မောက်မြို့နယ်၊ စည်ပင်သာယာရေးကော်မတီစျေးတွင် စျေးရောင်းနေရသူ ပြည်သူတစ်ဦးက ပြောဆိုသည်။

လက်တွေ့ ပြင်ပစျေးကွက်တွင် ကြက်သား၊ အမဲသား၊ ဝက်သားနှင့်ဆိတ်သားစျေးနှုန်းများမှာ တစ်ပိဿာလျှင် ငွေကျပ် နှစ်သောင်းဝန်းကျင်နှင့်နှစ်သောင်းကျော်အထိ မြင့်တက်နေကြောင်း သိရှိရသည်။

စစ်ကောင်စီက ကျပ်ငွေတန်ဖိုး မြင့်တက်စေရန်၊ ဒေါ်လာစျေးနှုန်း၊ ကုန်စျေးနှုန်း၊ ရွှေစျေးနှုန်းများ ကျဆင်းစေရန်အတွက် ကုန်သည်များနှင့်လုပ်ငန်းရှင်များကို ဖမ်းဆီး အရေးယူမှုများ ဆက်တိုက် လုပ်ဆောင်နေပြီး ယခုနောက်ဆုံး စည်ပင်သာယာစျေးများတွင် အခြေခံစားကုန်စျေးနှုန်းကိုပါ ခြိမ်းခြောက်ဖိအားပေး လာခြင်းဖြစ်ကြောင်း သိရှိရသည်။