မိုးကုတ်၊ မိုးမိတ်၌ စစ်သားများ အရပ်ဝတ်ဖြင့် အိမ်များတွင် ခိုအောင်းနေဟုဆို

တအာင်း အမျိုးသား လွတ်မြောက်ရေးတပ်မတော် (TNLA)နှင့်ပူးပေါင်းတပ်များ၏ မိုးကုတ်၊ မိုးမိတ်ဒေသတိုက်ပွဲများတွင် စခန်းများ ဆုံးရှုံခဲ့ရသည့် စစ်ကောင်စီတပ်ဖွဲ့များသည့် အရပ်ဝတ်အသွင်ပြောင်းကာ မြို့ပေါ်ရှိ အရပ်သားနေအိမ်များ၌ ခိုအောင်းနေထိုင်ကြ ကြောင်း ဒေသခံများနှင့် ပူးပေါင်းတပ်များထံက သိရသည်။

ထို့အတွက် TNLA ပူးပေါင်းတပ်တို့သည် စစ်ကောင်စီတပ်များ ထွက်ပေါက်မရှိနိုင်အောင်ပိတ်ဆို့၍ နယ်မြေ ရှင်းလင်း ထိန်းချုပ်မှုများပြုလုပ်နေသည်ဟု TNLA ပြောခွင့်ရ လွေးယေဦးက ပြောသည်။

“မိုးကုတ်နဲ့ မိုးမိတ်အခြေအနေက တခြားနဲ့မတူတာ စစ်ကောင်စီက သူတို့စခန်းကိုစွန့်ခွာပြီးတော့မှ အရပ်သားနေအိမ်မှာ ဝင်ရောက်ပြီးတော့ ခိုလှုံနေတာမျိုး ခိုအောင်းနေတာမျိုး အရပ်သားဝတ်တွေနဲ့ နေတာမျိုးဆိုတော့ ကျမတို့အတွက်က နေရာတိုင်းမှာ လိုက်ရှင်းနေပါတယ်” ဟု ပြောသည်။

လက်ရှိတွင် မိုးကုတ်မြို့နယ် ကမ္ဘာလုံးစေတီအနီးတပ်စွဲထားသည့် စစ်ကောင်စီတပ်ကို TNLA တို့က တိုက်ခိုက်နေသလို မိုးမိတ်မြို့နယ်တွင်လည်း အမှတ် ၂၁ စစ်ဆင်ရေး ကွပ်ကဲမှု စစ်ဌာနချုပ်နှင့် ခလရ ၂၂၃ တို့ကို ပူးပေါင်းတပ်များက တိုက် ခိုက်နေသည်။

မိုးမိတ်နှင့် မိုးကုတ်တို့တွင် ယခုရက်ပိုင်း တပ်စခန်း ၈ ခုခန့်ကို ပူးပေါင်းတပ်များက သိမ်းပိုက်နိုင်ခဲ့ပြီး ထိုစခန်းများသည် ဗျူဟာနှင့်တပ်ရင်းဌာနချုပ် စခန်းများ၏ အရှေ့ကာကင်းများဖြစ်သလို ဆက်သွယ်ရေးလမ်းကြောင်းအတွက် အရေးပါ သည့်စခန်းများလည်း ပါဝင်သည်။

ရှမ်းပြည်နယ် မိုးမိတ်မြို့နယ်ရှိ စစ်ကောင်စီ၏ ရွှေသာယာတပ်စခန်း၊ လက်ခုပ်ပင်တပ်စခန်း၊ လက်ခုပ်သံတပ်စခန်းနှင့် လယ်ကြီးတပ်စခန်း၊ သရက်တောစခန်းနှင့် မိုင်တိုင် (၆)တပ်စခန်းတို့ကို TNLA နှင့်ပူးပေါင်းတပ်များက သိမ်းပိုက်ပြီး ဖြစ်သည်။

မိုးမိတ်မြို့တွင်း တိုက်ပွဲများသည် ယခုလ ပထမအပတ်ကတည်း စတင်ခဲ့ပြီး တောက်လျောက် ပြင်းထန်နေသည်ဟု ဒေသခံအမျိုးသားတဦးက ပြောသည်။

၎င်းက “စစ်ကောင်စီဘက်က လက်နက်ကြီးတွေပစ်ကူပေးတာအပြင် လေကြောင်းကနေ Y12 တွေ ဂျက်ဖိုက်တာတွေနဲ့ ဗုံးကြဲတာ၊ ပစ်ခတ်တိုက်ခိုက်တာတွေ တောက်လျောက် ရှိနေတယ်” ဟု ပြောသည်။

ဇူလိုင် ၁၀ ရက်တွင်လည်း ရွှေတောင်ဦးဘုရားအနီးတဝိုက် စစ်ကောင်စီတပ် စကခ-၂၁၊ ခလရ-၂၂၃ နှင့် တအာင်း တပ်မတော် TNLA၊ PLA၊ MDY- PDF ပူးပေါင်းတပ်ဖွဲ့တို့ တိုက်ပွဲဖြစ်ပွားခဲ့ရာ တိုက်ပွဲအတွင်း စစ်ကောင်စီတပ်မှ ထောက်ပို့လေယာဉ်ဖြင့် လက်နက်ခဲယမ်းများ ၆ ကြိမ် ပစ်ချခဲ့ပြီး၊ Y-12 ဖြင့် ဗုံး ၁၆ လုံးဖြင့် မိုးမိတ်မြို့အတွင်း ပစ်ခတ်တိုက်ခိုက်ခဲ့သည်ဟု TNLA က သတင်းထုတ်ပြန်သည်။

မိုးမိတ်မြို့တွင် စစ်ကောင်စီ၏ ကချင်ပြည်နယ်၊ မြစ်ကြီးနား အခြေစိုက် မြောက်ပိုင်းတိုင်းစစ်ဌာနချုပ် လက်အောက်ခံ အခြေချဗျူဟာ၊ ခြေမြန်တပ်ရင်း ခမရ ၃၄၈ ၊ ခမရ ၂၇၆ နှင့် ခြေလျင်တပ်ရင်း ခလရ ၂၂၃ တပ်ရင်းများရှိနေပြီး မြေပြင်စစ်ကူများပေး၍ မရသည့်အခြေအနေကြောင့် လေကြောင်းဖြင့် ပစ်ကူ၊ စစ်ကူများပေးနေရခြင်းဖြစ်သည်ဟု စစ်ရေးသုတေသီတဦးက သုံးသပ်သည်။

မိုးမိတ်နှင့် နယ်နမိတ်ထိစပ်နေသည့် မန္တလေးတိုင်း မိုးကုတ်မြို့ကို TNLA နှင့် ပူးပေါင်းတပ်များက ပြီးခဲ့သည့် ဇွန်လ ၂၅ ရက်ကစတင်ထိုးစစ်ဆင်ခဲ့ရာ ဇွန်လ ၃၀ ရက်တွင် မိုးကုတ်မြို့ အနောက်ပိုင်းကို ပူးပေါင်းတပ်များက သိမ်းပိုက် ထိန်းချုပ် နိုင်ခဲ့ပြီး အရှေ့ပိုင်းကို ဆက်လက်စစ်ဆင်နေရာ ဇူလိုင် ၉ ရက်တွင် မိုးကုတ်မြို့အရှေ့ပိုင်းရှိ ၅ မိုင် တပ်စခန်းနှင့် ယောမူးတပ်စခန်းတို့ကို TNLA နှင့်ပူးပေါင်းတပ်များက သိမ်းပိုက်နိုင်ခဲ့သည်။

မိုးကုတ်မြို့အား အလုံးစုံ သိမ်းပိုက်နိုင်ရန် မိုးကုတ် အရှေ့ပိုင်း၌ အဓိက ကျန်ရှိနေသေးသည့်နေရာများမှာ ဗျူဟာကုန်း၊ ရဲစခန်းနှင့် မြို့နယ်ထွေအုပ်ရုံးတို့ဖြစ်ပြီး မင်းတံတားရပ်ကွက်၌ ဇူလိုင် ၁၂ ရက်က စ၍ ယနေ့တိုင် တိုက်ပွဲများ ဆက်တိုက် ဖြစ်နေပြီး ယမန်နေ့က ဈေးဟောင်းရပ် မြန်မာ့ရှေ့ဆောင်ဘဏ်အနီး လက်နက်ကြီးကျ၍ အိမ်များမီးလောင်ခဲ့သလို ဂေါ်ရခါး အမျိုးသမီးကြီးတဦး လက်နက်ကြီးမှန်၍ သေဆုံးခဲ့ရသည်။

TNLA နှင့် ပူးပေါင်းတပ်များက မိုးကုတ်မြို့အရှေ့ပိုင်းရှိ စစ်ကောင်စီကာကင်း စခန်းတချို့ကို ပြီးခဲ့သည့်ရက်ပိုင်း၌ သိမ်းပိုက်နိုင်ခဲ့ပြီး မြို့တွင်းသို့ ဆက်လက်ထိုးစစ်ဆင်ရန်ကြိုးပမ်းနေခြင်းဖြစ်သည်ဟု မိုးကုတ်PDF ဗျူဟာနှင့် ပကဖ တို့နှင့်နီးစပ်သည့်ဒေသခံကပြောသည်။

၎င်းက “မိုးကုတ် အရှေ့ပိုင်းမြို့ထဲကို ဝင်ဖို့ကခက်တယ်။ ဗျူဟာကလည်းအရမ်းမြင့်တယ်၊၊ စစ်တပ်က ခံစစ်သေချာ လုပ်ထားတယ်။ ကင်းပုန်းတွေကလည်းနေရာတိုင်းပဲ”ဟု ပြောသည်။

မိုးကုတ်မြို့ထိုးစစ်နှင့်အတူ မန္တလေးPDFနှင့် ပူးပေါင်းတပ်များက လက်ရှိ မန္တလေး-မိုးကုတ်လမ်းပေါ်တလျောက် မတ္တရာ၊ စဉ့်ကူးနယ်များတွင် စခန်းသိမ်း တိုက်ပွဲများ ဖော်ဆောင်နေခြင်းသည် မိုးကုတ်ကို မြေပြင် စစ်ကူ မလာနိုင်စေရန် ဖြတ်တောက်ထားနိုင်သည့် အခြေအနေဖြစ်သည်။