စစ်ခေါင်းဆောင်နေရာ တည်မြဲရေး လူယုံများကို ရာထူးတိုးပေး

ရှမ်းမြောက်တိုက်ပွဲများတွင် လားရှိုးအခြေစိုက် အရှေ့မြောက်တိုင်းစစ်ဌာနချုပ်( ရမခ) ကျရှုံးပြီးနောက် တပ်ထောက်ခံသူများ ဝေဖန်ခံနေရသော ဗိုလ်ချုပ်မှူးကြီးမင်းအောင်လှိုင်သည် ရာထူးတည်မြဲရေးအတွက် လူယုံများဖြစ်သော နိုင်ငံတော်စီမံအုပ်ချုပ်ရေးကောင်စီ(စစ်ကောင်စီ) အဖွဲ့ဝင် ဒုတိယဗိုလ်ချုပ်ကြီးများဖြစ်သည့် အောင်လင်းဒွေး၊ ညိုစော၊ ရဲဝင်းဦးတို့အား ဗိုလ်ချုပ်ကြီးရာထူးသို့ တိုးမြှင့်ခန့်အပ်လိုက်ကြောင်း နေပြည်တော်ရှိ သတင်းရင်းမြစ်များထံမှ သိရသည်။

ပြီးခဲ့သည့် ရက်ပိုင်းက ဆိုရှယ်မီဒီယာတွင် ပျံ့နှံခဲ့သော ဒုဗိုလ်ချုပ်ကြီး အောင်လင်းဒွေးက အာဏာသိမ်းသည့်သတင်း ထွက်လာပြီးနောက် ထိုသို့ ၎င်းတို့ သုံးဦးကို ရာထူးတိုးမြှင့်ပေးလိုက်ခြင်းဖြစ်သည်။

“ဖွဲ့စည်းပုံမရှိဘဲ ဆရာမွေး တပည့်မွေး လုပ်တာပါဗျာ။ လူရွှင်တော်တွေပြောသလို ငါ ရှင်ဘုရင် ဘယ်နှစ်ပတ်လှည့်လှည့်ဆိုတာမျိုးပေါ့” ဟု CDM အရာရှိ တဦးက ဆိုသည်။

ဗိုလ်ချုပ်ကြီးအဆင့်ဖြစ်သွားသည့် ဒုဗိုလ်ချုပ်ကြီးအောင်လင်းဒွေးနှင့် ဒုဗိုလ်ချုပ်ကြီးညိုစောတို့မှာ အရန်အင်အား စာရင်းသွင်းခံထားရသူများဖြစ်ပြီး အရန်အင်အားထဲရောက်သူများအား နောက်တဆင့် ရာထူးတိုးပေးသော အစဉ်အလာ မရှိခဲ့ပေ။

ဒုဗိုလ်ချုပ်ကြီးအောင်လင်းဒွေးသည် စစ်တက္ကသိုလ် ဗိုလ်လောင်းသင်တန်း အပတ်စဉ် ၂၅ ကျောင်းဆင်းဖြစ်ကာ လက်ရှိ စစ်ကောင်စီ အတွင်းရေးမှူးလည်းဖြစ်ပြီး ဗိုလ်ချုပ်မှူးကြီး မင်းအောင်လှိုင် စစ်တက္ကသိုလ်ကျောင်းအုပ်ကြီးဘဝကတည်းက တာဝန်အတူထမ်းဆောင်ခဲ့ကြသူများဖြစ်သည်။

ဒုဗိုလ်ချုပ်ကြီးအောင်လင်းဒွေးသည် ဗိုလ်မှူးကြီးအဆင့်ဖြင့် ဒကစမှူး(စစ်တွေ)မှသည် စစ်တက္ကသိုလ် အောင်ဇေယျ ဗိုလ်လောင်းတပ်ရင်း တပ်ရင်းမှူးအဖြစ် တာဝန်ထမ်းဆောင်ခဲ့သလို ဗိုလ်မှူးချုပ်အဆင့်ဖြင့် ၂၀၁၁ မေလ ၉ရက် မှ ၂၀၁၁ အောက်တိုဘာလ ၃ ရက်ထိ တပ်မတော်နည်းပညာတက္ကသိုလ် ကျောင်းအုပ်အဖြစ် တာဝန်ယူခဲ့ကြောင်း၊ ဗိုလ်ချုပ်အဆင့်ဖြင့် အနောက်ပိုင်းတိုင်းစစ်ဌာနချုပ် တိုင်းမှူး၊ တပ်မတော်မှတ်တမ်းရုံး ညွှန်ကြားရေးမှူးချုပ်တာဝန်များလည်း ထမ်းဆောင်ခဲ့ကြောင်း သိရသည်။

၂၀၁၆ ဩဂုတ်လတွင် ဒုဗိုလ်ချုပ်ကြီးအဆင့်ဖြင့် စစ်ဥပဒေချုပ်ဖြစ်လာခဲ့သလို ပြည်ထောင်စုအဆင့် ပစ်ခတ်တိုက်ခိုက်မှု ရပ်စဲရေးဆိုင်ရာ ပူးတွဲစောင့်ကြည့်ရေးကော်မတီတွင် ပါဝင်ခဲ့သည်။

စစ်တက္ကသိုလ် အမှတ်စဉ် ၂၃ ဆင်းဖြစ်သည့် ဒုဗိုလ်ချုပ်ကြီး ညိုစောသည်လည်း နိုင်ငံတော် စီမံအုပ်ချုပ်ရေးကောင်စီ ဥက္ကဋ္ဌရုံး ပြည်ထောင်စုဝန်ကြီးဖြစ်သလို အာဏာသိမ်းစစ်ခေါင်းဆောင် မင်းအောင်လှိုင်၏ အကြံပေးပုဂ္ဂိုလ်လည်းဖြစ်ကာ နေပြည်တော်ရှိ မာရဝိဇယဗုဒ္ဓရုပ်ပွားတော် တည်ရာ၌ ပါဝင်ကူညီခဲ့မှုကြောင့် သရေစည်သူဘွဲ့ကို ပေးအပ်ခံထားရသည်။

ဒုဗိုလ်ချုပ်ကြီး ညိုစောသည် တပ်မတော်နည်းပညာတက္ကသိုလ်နှင့် စစ်တက္ကသိုလ်တို့တွင် ကျောင်းအုပ်ကြီးတာဝန်များ ထမ်းဆောင်ခဲ့သလို တောင်ပိုင်းတိုင်းစစ်ဌာနချုပ်၊ အလယ်ပိုင်းတိုင်းစစ်ဌာနချုပ် စစ်တိုင်းမှူး၊ ၂၀၁၄ မှ ၂၀၂၀ ဧပြီလအထိ စစ်ထောက်ချုပ်နှင့် အာဏာသိမ်းပြီးနောက် ရုရှားထံမှ ဆီဝယ်ယူရေးကို ဦးဆောင်ရသူတဦးလည်း ဖြစ်သည်။

ထို့ပြင် မြန်မာ့စီးပွားရေးကော်ပိုရေးရှင်း( MEC ) ဥက္ကဋ္ဌအဖြစ် တာဝန်ထမ်းဆောင်လျက်ရှိသလို စစ်တပ်ပိုင် အင်းဝဘဏ်၏ ဥက္ကဋ္ဌလည်းဖြစ်ကာ အာဏာသိမ်းစစ်ခေါင်းဆောင် မင်းအောင်လှိုင်၏ အကြံပေးပုဂ္ဂိုလ်အဖြစ် ၂၀၂၃ ဇူလိုင် ၅ရက်တွင် ခန့်အပ်ခံခဲ့သည်။

တပ်မတော်(ကြည်း)ဗိုလ်သင်တန်းကျောင်း အမှတ်စဉ် (၇၇) (OTS 77) ဆင်း ဇေယျကျော်ထင်ဘွဲ့ရ ဒုဗိုလ်ချုပ်ကြီး ရဲဝင်းဦး သည် စစ်ဘက်ရေးရာလုံခြုံရေး(စရဖ)အရာရှိချုပ်ဖြစ်ပြီး စစ်ခေါင်းဆောင်နှင့်အတူ အမြဲတွေ့နေရသူလည်းဖြစ်ကာ စစ်ကောင်စီ တွဲဖက်အတွင်းရေးမှူးလည်း ဖြစ်သည်။

စစ်အာဏာသိမ်းမှု ဆန့်ကျင့်ရေးလှုပ်ရှားသူများကို ဖမ်းဆီးကာ စစ်ကြောရေး ငရဲခန်းများသို့ ပို့ဆောင်စစ်ဆေးရာတွင် ဒုဗိုလ်ချုပ်ကြီး ရဲဝင်းဦးက ကြီးကြပ်ရသဖြင့် စစ်ဘက်ရေးရာ လုံခြုံရေး အကြီးအကဲ၊ စစ်ကောင်စီ ငရဲခန်းများအကြီးအကဲ တဦးဖြစ်သည်။