ရန်ကုန်-ပြည် လမ်းပိုင်းရှိ စစ်ကွင်း တာဆုံဂိတ်ကို ဝင်ရောက် တိုက်ခိုက်မှု စစ်ကောင်စီ တပ်သား ၈ ဦးသေဆုံးပြီး သေနတ် ၁ လက် သိမ်းဆည်းရရှိ (ရုပ်သံ)
ပဲခူးတိုင်း၊ စစ်ကွင်းမြို့၊ အုတ်တွင်းကျေးရွာအနီး ရန်ကုန်-ပြည် လမ်းပိုင်းရှိ စစ်ကွင်းတာဆုံဂိတ်ကို ဝင်ရောက် တိုက်ခိုက်ရာ စစ်ကောင်စီ တပ်သား ၈ ဦးသေဆုံးပြီး သေနတ် ၁ လက် သိမ်းဆည်းရရှိခဲ့ကြောင်း သာယာဝတီခရိုင် PDF မှ တာဝန်ရှိသူ တစ်ဦးက ပြောဆိုသည်
မတ်လ ၂၀ ရက်နေ့တွင် မင်းလှမြို့နယ်၊ စစ်ကွင်းမြို့၊ အုတ်တွင်းကျေးရွာအနီး ရန်ကုန်-ပြည် လမ်းပိုင်း၌ အထိုင်ချ တပ်ဆွဲထားသော ပြည်သူများကို ဖမ်းဆီး ငွေညှစ်နေသည့် စစ်ကွင်းတာဆုံ စစ်ဆေးရေးဂိတ်ကို သာယာဝတီခရိုင် တပ်ရင်း ၃၈၀၂ တပ်ခွဲ ၂ မှ ရဲဘော်များက ဝင်ရောက် တိုက်ခိုက်ခဲ့ခြင်းဖြစ်ကြောင်း သိရသည်။
ယင်းတိုက်ခိုက်မှုသည် ၁ နာရီ ၄၅ မိနစ် ကြာမြင့်ခဲ့ပြီး အကြမ်းဖက် စစ်ကောင်စီ တပ်သား ၇ ဦးသေဆုံးကာ ၆ ဦး ဒဏ်ရာ ရရှိခဲ့ကြောင်း၊ တိုက်ပွဲအတွင်း အကြမ်းဖက် စစ်ကောင်စီ တပ်သားများထံမှ ကာဘိုင်သေနတ် ၁ လက်၊ ကျည်ဘောက် ၁ ခု၊ ကျည် ၂၀ တောင့်၊ စစ်အသုံးအဆောင်တချို့ နှင့် ဆိုင်ကယ် ၁ စီးတို့ကို သိမ်းဆည်း ရရှိခဲ့ပြီး စခန်းကို မီးရှို့ ရှင်းလင်းခဲ့သော်လည်း မီးအနည်းငယ်သာ လောင်ကျွမ်းခဲ့ကြောင်း သိရှိရသည်။
ထိုသို့ တိုက်ခိုက်မှုဖြစ်ပွားပြီးနောက် ယနေ့ မတ်လ ၂၁ ရက်နေ့ နံနက် ၁၀ နာရီခန့်တွင် စစ်ကွင်းတာဆုံ စစ်ဆေးရေးဂိတ်ရှိ ဘန်ကာတွင် ပြန်လည် လုံခြုံရေးယူနေသော အကြမ်းဖက် စစ်ကောင်စီ တပ်သားများကို တော်လှန်ရေး ရဲဘော်များက အဝေးထိန်းမိုင်းဖြင့် ထပ်မံ ဖောက်ခွဲ တိုက်ခိုက်ခဲ့ရာ ၁ ဦးပွဲချင်းပြီး သေဆုံးပြီး ၄ ဦး ထိခိုက်ဒဏ်ရာရရှိခဲ့ကြောင်း သိရသည်။
“ပြည်သူတွေကို နှိပ်စက်နေတဲ့ စစ်ကွင်းတာဆုံ စစ်ခွေးဂိတ်ကို ရှောင်တခင်တိုက်ခိုက်တာ စခ ၇ ကောင်သေတယ်။ ၆ကောင်ဒဏ်ရာရတယ်။ စခတွေ အထိနာပြီး ကျည်နည်းလာတော့ စက်လက်နဲ့ပစ်ပြီး စစ်ကွင်းဘက်ကို ဖရိုဖရဲနဲ့ ဆုတ်ပြေးတယ်။ အလောင်းတွေကိုတော့ လမ်းဘေးက ခြံတွေထဲမှာထားခဲ့ပြီး မနက်ကြ PDFယူနီဖောင်းဝတ်ပြီး အထက်ကို PDF တွေသေတာပါလို့ လိမ်တင်တယ်။ စခတွေ ပြေးတုန်းက ပုဆိုးတစ်ထည် အုတ်တွင်းအထွက်မှာ ကျကျန်ခဲ့တာတွေ့တယ်။ စခန်းကို သိမ်းပြီး မီးရှို့နေတဲ့အချိန် စစ်ကားတွေတက်လာတယ်သတင်းရလို့ ပြန်ဆုတ်လာတာ စခန်းက တချို့တဝက်ပဲ မီးလောင်သွားတယ်။ ဒီမနက် ၁၀နာရီလောက်မှာ အဲ့ဂိတ်က ဘန်ကာမှာ လုံခြုံယူပြီးပြန်နေတဲ့ စခနဲ့ ရခတွေကို အဝေးထိန်းမိုင်းနဲ့ တိုက်ခိုက်တာ ရခ ၁ ကောင်သေတယ်။ စခ ဗိုလ် ၁ ကောင်အပါအဝင် ၄ ကောင် ဒဏ်ရာရပြီး ၃ ကောင် အခြေအနေမကောင်းဘူး။ လူနာတင်ယာဥ် ၄ စီးနဲ့ အဲ့ဒဏ်ရာရတာတွေကို လာတင်ပြီး ၃ ကောင်က ရန်ကုန်တင်တယ်။ ၁ ကောင်က မင်းလှပို့တယ်လို့ သိရတယ်” ဟု သာယာဝတီခရိုင် PDF မှ တာဝန်ရှိသူတစ်ဦးက ပြောဆိုသည်။
ဆက်လက်၍ ပြည်သူများနှင့် တော်လှန်ရေးတပ်ဖွဲ့များကို ဒုက္ခပေးနေသော အကြမ်းဖက် စစ်တပ်နှင့် ၎င်းတို့၏ ဒေါက်တိုင်များကို အရှိန်မြင့် တိုက်ခိုက်သွားမည် ဖြစ်သောကြောင့် ပြည်သူများအနေဖြင့် ၄င်းတို့အနီး သွားလာနေထိုင် ခြင်းများ လုံးဝ မပြုလုပ်ကြရန် သာယာဝတီခရိုင် တပ်ရင်း ၃၈၀၂ တပ်ခွဲ ၂ က အသိပေး ပြောဆိုထားသည်။