ကချင်ပြည်နယ်၊ ၀ိုင်းမော်မြို့နယ်၊ လမြန်ကျေးရွာအနီး၌ ကချင်လွတ်လပ်ရေးတပ်မတော်(KIA) ပူးပေါင်းတပ်နှင့် စစ်ကောင်စီတပ်အကြား ယနေ့(မတ်လ ၂၄ရက်)အထိ တိုက်ပွဲဆက်လက်ဖြစ်ပွားနေကြောင်း ကချင် စစ်ရေး သတင်းရင်းမြစ်က ပြောသည်။
“ သူတို့ စစ်ကြောင်းထိုးလာလို့ တိုက်ပွဲဖြစ်နေတယ်။ ဒီလောက်ပဲ သိရသေးတယ်”ဟု ကချင်သတင်းရင်းမြစ်က ပြောသည်။
ဝိုင်းမော်မြို့နယ် လမြန်ကျေးရွာဘက်သို့ စစ်ကောင်စီတပ်က ဝင်ရောက်လာ၍ မတ်လ ၂၁ရက်က စတင်တိုက်ပွဲဖြစ်ခဲ့ပြီး ယနေ့အထိ တိုက်ပွဲဆက်ရှိနေခြင်းဖြစ်သည်ဟု ၎င်းက ပြောသည်။
KIAပူးပေါင်းတပ်သည် ပြီးခဲ့သည့် တစ်နှစ်ကျော်အတွင်း ဝိုင်းမော်မြို့ရှိ စစ်ကောင်စီ၏ တပ်ရင်းဌာနချုပ် အချို့နှင့် ဗျူဟာစခန်းများအပါအဝင် တပ်စခန်းများစွာ သိမ်းပိုက်ထားရာ စစ်ကောင်စီတပ်အချို့သာ ကျန်တော့သည်။
KIAပူးပေါင်းနှင့် စစ်ကောင်စီတပ်တို့သည် မတ်လ ၂၂ရက်ကလည်း ဖားကန်မြို့နယ်တွင် တိုက်ပွဲရှိခဲ့သည်ဟု KIAက အသိပေးထားသည်။
KIAပူးပေါင်းတပ်က ဗန်းမော်မြို့သိမ်းစစ်ဆင်ရေးကို အရှိန်မြှင့် ဖော်ဆောင်နေစဉ် စစ်ကောင်စီကလည်း ဖားကန့်၊ တနိုင်း၊ ဝိုင်းမော်၊ ပူတာအို၊ မြစ်ကြီးနား မြို့နယ်များ၌ စစ်ရေးလှုပ်ရှားခြင်း၊ အင်အားဖြည့်တင်းခြင်းနှင့် လူသစ်စုဆောင်းခြင်းများ ပြုလုပ်လျက်ရှိသည်။
“ဗန်းမော် ထူးခြားစစ်ရေး မသိရသေး”ဟု ကချင်သတင်းရင်းမြစ်က ပြောသည်။
KIAပူးပေါင်းတပ်သည် ဗန်းမော်မြို့ရှိ စစ်ကောင်စီ၏ အမြောက်တပ်၊ တင့်ကားတပ်၊ သံချပ်ကာတပ်၊ ခြေလျင်တပ်အချို့နှင့် လေယာဉ်ကွင်းကို သိမ်းပိုက်ထားပြီး အမှတ်(၂၁) စစ်ဆင်ရေးကွပ်ကဲမှုဌာနချုပ်ကို အပြီးသတ်သိမ်းနိုင်ရေး တိုက်ခိုက်နေခြင်းဖြစ်သည်။အဆိုပါ စကခ(၂၁)၏ ကာကင်း စခန်းများအနက် စခန်းအများစုကို သိမ်းပိုက်ထားပြီးဖြစ်ကြောင်း ကချင်စစ်ရေးသတင်းရင်းမြစ်က အသိပေးထားသည်။
(ကချင်လွတ်လပ်ရေးတပ်မတော်(KIA)မှ ရဲဘော်များအား တိုက်ပွဲတစ်ခုအတွင်း တွေ့ရစဉ်။ ဓာတ်ပုံ – CJ)