ဖလမ်းမြို့နယ်တစ်ခုလုံးကို အပြီးသတ်တိုက်ခိုက် သိမ်းပိုက်

ချင်းပြည်နယ်၊ ဖလမ်းမြို့နယ်တစ်ခုလုံးကို အပြီးသတ်တိုက်ခိုက် သိမ်းပိုက်ရရှိပြီဟု ချင်းညီနောင်တပ်ဖွဲ့က ကြေညာ၊ တီးတိန်မြို့ကို ဆက်လက် ချီတက်မည်

ချင်းပြည်နယ်၊ ဖလမ်းမြို့နယ်တစ်ခုလုံးကို အပြီးသတ်တိုက်ခိုက် သိမ်းပိုက်ရရှိပြီဟု ချင်းညီနောင်တပ်ဖွဲ့က ယနေ့ တရားဝင် ကြေညာသည်။

ချင်းညီနောင်စစ်ဆင်ရေးတပ်ဖွဲ့က ဧပြီလ ၉ ရက်နေ့တွင် စစ်ကောင်စီ၏ နောက် ဆုံးလက်ကျန် တပ်ရင်း ခလရ ၂၆၈ ကို အပြီးသတ်သိမ်းပိုက်ကာ ဖလမ်းမြို့နယ် တစ်ခုလုံး စစ်ကောင်စီကင်း စင် သော နယ်မြေအဖြစ် ဖော်ဆောင်နိုင်ခဲ့ပြီဖြစ်ကြောင်း၊ တီးတိန်မြို့သို့ ဆက်လက်ချီတက်မည်ဖြစ်ကြောင်း သိရှိရသည်။

ချင်းအမျိုးသားကာကွယ်ရေးတပ် (CNO/CNDF) အထွေထွေအတွင်းရေးမှူး ဆလိုင်းဝီလီယံချင်းက “ချင်းညီနောင် စစ်ဆင်ရေး ဖလမ်းမြို့ သိမ်းတိုက်ပွဲက မင်းတပ်နဲ့အတူ ၂၀၂၄ ခုနှစ်နိုဝင်ဘာလကနေ စခဲ့တာဖြစ်တယ်။ တပ်ရင်းတစ်ရင်းတည်းမဟုတ်ဘူး။ ၃ ရင်းနဲ့ တိုက်နေရတဲ့ပုံစံဖြစ်တယ်။ အချိန်တွေ ပိုပြီးကြာသွားတယ်။ ကုန်ကျစရိတ်လည်း စစ်ဆင်ရေးမှာ အများကြီးကုန်တာရှိတယ်။ ဘာပဲပြောပြော ကျနော်တို့ရဲ တော်လှန်ရေးမှာ ပေးဆပ်မှုတွေ လွတ် မြောက်မှုအတွက် ကိုယ့်ကံကြမ္မာကိုယ်ဖန်တီးဖို့ ပေးဆပ်ရတာဖြစ်တယ်။ ချင်းပြည်ထဲမှာ တီးတိန်မြို့ကိုလည်း ထပ်ပြီးမှ ဝင်ရောက်ဖို့ရှိတယ်။ ပိုပြီးတော့ ကြိုး စားအားထုတ်ဖို့လိုတယ်။ မြို့သိမ်းရတာထက် ထိန်းရတာလည်း ခက်ခက်ခဲခဲ လုပ်ရတာဖြစ်တယ်။ စစ်ပုံကျတဲ့ အမိန့်နာခံဖို့ရှိတဲ့ Professional Army ဖြစ်အောင် ကြိုးစားရမယ်။ ဒီအောင်မြင်မှု ဖလမ်းပြည်သူလူထုတင်မဟုတ်ဘူး။ အဖိနှိပ်ခံပြည်သူလူထုအားလုံးရဲ့ အောင်မြင်မှုဖြစ်တယ်။ ၂၀၂၄ မှာ စစ်ကောင် စီ ကင်းစင်ဖို့ ရည်ရွယ်ခဲ့ပေမယ့် ၆၀ ရာခိုင်နှုန်းပဲပြီးခဲ့တယ် ။ ၄ နေရာရခဲ့တယ်။ ” ဟု တိုက်ရိုက် Live မှတစ်ဆင့် ပြောဆိုသည်။

ဖလမ်းမြို့သိမ်းတိုက်ပွဲတွင် စစ်ကောင်စီ၏ လက်နက်ကြီးများ အပါအဝင် လက် နက် ယမ်း အမြောက်အမြားနှင့် ငွေကြေးများစွာကိုလည်း သိမ်းပိုက်ရရှိခဲ့သည်။

၂၀၂၄ ခုနှစ်၊ နိုဝင်ဘာလ ၉ ရက်နေ့က ဖလမ်းမြို့သိမ်းတိုက်ပွဲကို ချင်းညီနောင်စစ်ဆင်ရေး (Operation CB) အဖြစ် ထိုးစစ်ဆင်တိုက်ခိုက်ခဲ့ရာ စစ်ကောင်စီတပ်က ဖလမ်းမြို့ မကျစေရေး အ တွက် ရှိရင်း ခလရ ၂၆၈ တပ်ရင်း အင်အားအပြင် ၂၀၂၄ ဒီဇင်ဘာလတွင် ခလရ ၈၉ မှ စစ်ကူ အင် အား ၁ဝဝ ဝန်းကျင်နှင့် ၂၀၂၅ မတ်လတွင် တပ်မ ၇၇ လက်အောက်ခံ ခလရ ၃၉၁ မှ စစ်ကူအင်အား ၁၀ဝ ခန့်ဖြင့် အင်အားအကြိမ်ကြိမ် ထပ်မံဖြည့်တင်းခဲ့ကြောင်း၊ ထို့အပြင် လေကြောင်းတိုက်ခိုက်မှု အကြိမ်ပေါင်း ၁ဝဝဝ ကျော် ဖြင့် အပြင်းအထန် ခုခံခဲ့ကြောင်း သိရသည်။

ချင်းညီနောင်စစ်ဆင်ရေး (Operation CB) ဖလမ်းမြို့ သိမ်းတိုက်ပွဲတွင် 96 Soldiers PDF ၊ Anti-Fascist Internationalist Front (AIF) ၊ Burma National Revolutionary Army (BNRA) ၊ Burmese Revolutionary Technical Front (BRTF) ၊ Generation Z Army (GZA) ၊ Giant Revolution Force (GRF) ၊ Harmonious Northern Brothers (HNB) ၊ Kalay Revolution Force (KRF) ၊ Kalay Urban Guerrilla (Kalay UG) ၊ Myingyan Black Tiger (MBT) ၊ National Liberation Army (NLA) ၊ Revolution Ambulance Wolf (RAW Medical Team) ၊ Sagaing Federal Troop (SFT-Sol) ၊ Yaw Defense Force (YDF) ၊ Zo Army (ZA) ၊ ကလေးခရိုင် ပကဖနှင့် Drone အဖွဲ့တို့ ပါဝင်ခဲ့ကြောင်း သိရသည်။

ဖလမ်းမြို့ နယ်တစ်ခုလုံး စစ်ကောင်စီကင်းစင်သော နယ်မြေအဖြစ် ဖော်ဆောင်နိုင်ခဲ့ခြင်းမှာ ချင်းညီနောင် နှင့် မဟာမိတ်အင်အားစုများ၏ မဆုတ်မနစ်သော စိတ်ဓာတ်ဖြင့် ကြံ့ကြံ့ခံထိုးစစ်ဆင် တိုက်ခိုက်မှု၊ အာရက္ခ တပ်တော်မှ ခဲယမ်းစစ်လက်နက်များအပြင် စစ်ရေးဆိုင်ရာ အကြံဉာဏ်များ ပံ့ပိုးကူညီမှုနှင့် မိဘပြည်သူများ၏ တက်ညီလက်ညီ တစိုက်မတ်မတ် ထောက်ပို့ပါဝင်မှုများ ကြောင့် သာ ဖြစ်ပါကြောင်း ကြေညာထားသည်။

ချင်းညီနောင်စစ်ဆင်ရေး(Operation CB) အဖြစ် ဖော်ဆောင်ခဲ့သော ဖလမ်းမြို့ သိမ်းစစ်ဆင်ရေး အတွင်း အသက်ပေးသွားကြသည့် အာဇာနည်သူရဲကောင်းများ၊ ကိုယ်လက်အင်္ဂါ ပေးဆပ်ခဲ့ကြသည့် ရဲဘော်များနှင့် အောင်ပွဲရသည်အထိ ရွပ်ရွပ်ချွံချွံ ချီတက်တိုက်ပွဲဝင်ခဲ့ကြသော တပ်မှူး၊ တပ်သား များ၏ ရဲစွမ်းသတ္တိနှင့် ဇွဲလုံ့လ ရှိမှုတို့ကို လေးစားစွာ ဂုဏ်ပြုပါကြောင်းနှင့် ချင်းညီနောင် (CB) အနေ ဖြင့် စစ်အာဏာရှင်စနစ် ကျဆုံးရေးနှင့် ဖက်ဒရယ်ဒီမိုကရေစီ ပြည်ထောင်စု တည်ဆောက်ရေးတွင် မဟာမိတ်များနှင့်အတူ ဆက်လက်တိုက်ပွဲဝင် သွားမည်ဖြစ်ကြောင်း ဆက်လက် ကြေညာထားသည်။