ငလျင်ဘေးသင့်ပြည်သူတွေကို ကူညီပံ့ပိုးပေးရေးမှာ ပေါင်းစပ်ဆောင် ရွက် ဖို့ ကုလသမဂ္ဂရဲ့အထူးကိုယ်စား လှယ်နဲ့ နေပြည်တော်မှာ ဧပြီ ၉ ရက် ကတွေ့ဆုံဆွေးနွေးလိုက်တယ်လို့ အာဏာသိမ်း စစ်ကောင်စီနိုင်ငံခြားရေးဝန်ကြီး ဌာနက သတင်းထုတ်ပြန်ပါတယ်။
ငလျင်ဒဏ်ကြောင့် ထိခိုက်ပျက်စီးသွားတဲ့ နိုင်ငံခြားရေးဝန်ကြီးဌာနအဆောက်အဦးရှေ့မှာ ကုလအထူးကိုယ်စားလှယ်ဂျုလီဘိရှော့နဲ့ စစ်ကောင်စီနိုင်ငံခြားရေးဝန်ကြီးတို့ တွေ့ဆုံနေကြပုံကိုအသားပေး ဖော်ပြပြီးသတင်းထုတ်ပြန်လာတာပါ။
စစ်ကောင်စီ နိုင်ငံခြားရေးဝန်ကြီးဌာနရဲ့ သတင်းထုတ်ပြန်ချက်မှာတော့ ငလျင်ဘေးသင့် ပြည်သူတွေကို ကူညီပံ့ပိုးပေးရေးမှာ မြန်မာနိုင်ငံနဲ့ ကုလသမဂ္ဂအကြား ပေါင်းစပ်ညှိနှိုင်းဆောင်ရွက်မယ့်ကိစ္စရပ်တွေကိုဆွေးနွေးခဲ့ကြတယ်လို့ဆိုပေမယ့် အသေးစိတ်အချက်အလက်တွေ ဖော်ပြတာမရှိပါဘူး။
ကုလသမဂ္ဂအထွေထွေအတွင်းရေးမှုးချုပ် အန်တိုနီဂူတာရက်စ် ကတော့ စေလွှတ်လိုက်တဲ့ အထူးကိုယ်စားလှယ် ရဲ့ မြန်မာနိုင်ငံ ခရီးစဉ်အတွင်း ငြိမ်းချမ်းရေးနဲ့ နိုင်ငံရေးတွေ့ဆုံဆွေးနွေးမှုတွေဖြစ်ပေါ်လာအောင် ဆွေးနွေးသွားမယ်လို့ ဧပြီလ ၃ ရက်က ပြောကြားထားပါတယ်။
ဂျုလီဘိရှော့ ရဲ့နေပြည်တော်တွေ့ဆုံမှု နဲ့ပတ်သက်ပြီး ကုလသမဂ္ဂဘက်ကတော့ သတင်းထုတ်ပြန်တာမရှိသေးပါဘူး။
ဂျုလီဘိရှော့ရဲ့ နေပြည်တော်ခရီးစဉ်ဟာ ကုလအထူးကိုယ်စားလှယ်အဖြစ်ခန့်အပ်လိုက်ပြီး တစ်နှစ်နီးပါးကြာမှ မြန်မာနိုင်ငံကို ပထမဆုံးအကြိမ်သွားရောက်တဲ့ခရီးစဉ်ဖြစ်တယ်လို့ Australian Broadcasting Corporation (ABC) သတင်းဌာနက ဖော်ပြပါတယ်။
ဂျုလီဘိရှော့ဟာ မြန်မာနိုင်ငံတွင်း စီးပွားရေး လုပ်ကိုင်နေတဲ့ တရုတ်နိုင်ငံပိုင် ကုမ္ပဏီ တွေနဲ့ အကျိုး စီးပွား ဆက်နွယ်မှုတွေရှိတာကြောင့် စုံစမ်းစစ်ဆေးပေးဖို့ အရပ်ဘက်အဖွဲ့အစည်း ၃၀၀ နီးပါးက ကုလသမဂ္ဂကိုတောင်းဆိုထားတာရှိတာပါ။
စွပ်စွဲချက်ကိုတော့ ဂျုလီဘိရှော့က ငြင်းဆိုထားပါတယ်။
ဂျုလီဘိရှော့မတိုင်ခင် အစောပိုင်း ရက်တွေက ကုလသမဂ္ဂ လူသားချင်းစာနာမှုဆိုင်ရာ အကြီးအကဲ Tom Fletcher မြန်မာနိုင်ငံကိုလာရောက်ထားပါတယ်။
ငလျင်ကြောင့် လူသားချင်းစာနာထောက်ထားမှုအကူအညီလိုအပ်နေသူတွေရှိရာ ဒေသတွေဆီ အတားအဆီးမရှိ သွာရောက်ခွင့်ရဖို့လိုအပ်တယ်ဆိုတာကို နေပြည်တော်မှာစစ်ကောင်စီနဲ့ တွေ့ဆုံချိန်က ဆွေးနွေးခဲ့တယ်လို့ Tom Fletcher က အယ်ဂျားဇီးယားသတင်းဌာန နဲ့ အင်တာဗျုးမှာ ထည့်သွင်းပြောခဲ့ပါတယ်။
မြန်မာနိုင်ငံမှာ မတ်လ ၂၈ ရက်က လှုပ်ခတ်ခဲ့တဲ့ ငလျင်ကြီးကြောင့် လူသိန်းပေါင်းများစွာရဲ့ ဘ၀တွေ ပျက်စီးခဲ့ရပြီး အဲဒီ မိသားစုတွေဟာ အကူအညီမပါဘဲ ပြန်ရုန်းထနိုင်ဖို့ဆိုတာ ခက်ခဲလွန်းနေတယ်လို့ ကုလသမဂ္ဂက ဆိုထားပါတယ်။
မြန်မာ့ငလျင်ဘေးအတွက် ကုလသမဂ္ဂအနေနဲ့ နိုင်ငံတကာ ကနေ ကတိပြုငွေကြေး ဒေါ်လာ ၉၃ သန်းနဲ့ ကုလသမဂ္ဂ အရေးပေါ်ရန်ပုံငွေဒေါ်လာ ၅ သန်းကို အသုံးပြုသွားမယ်လို့သိရပါတယ်။
Photo: စစ်ကောင်စီလျှပ်စစ်ဌာနက ကျွေးမွေးထားတဲ့ ငလျင်ဘေးသင့် နေပြည်တော်က လျှပ်စစ်ဝန်ထမ်းနန်းနန်းတို့၏ နေ့လည်စာ