တာမခံဗျူဟာသို့ စစ်ကူလာသည့် စစ်ကောင်စီတပ်အင်အား (၆၀)ခန့် ချေမှုန်းခံရ

ကချင်ပြည်နယ်၊ ဖားကန့်မြို့နယ်အပိုင်း ဖားကန့်နှင့် စစ်ကိုင်းတိုင်းအစပ်ဒေသ တာမခံကျေးရွာရှိ စစ်ကောင်စီနှင့် SNA (ရှမ်းနီလက်နက်ကိုင်တပ်) တို့ ပူးပေါင်း အထိုင်စခန်းကို ထိုးစစ်ဆင်နေစဉ် စစ်ကူတက်လာသည့်စစ်ကောင်စီတပ် အင်အား (၆၀) ပါစစ်ကြောင်း ချေမှုန်းခံလိုက်ရကြောင်း ယနေ့ KPDF သတင်းရင်းမြစ်က အတည်ပြုပြောကြားထားသည်။

တာမခံကျေးရွာရှိ စစ်ကောင်စီနှင့် SNA တို့ ပူးပေါင်းအထိုင်စခန်းကိုဖေဖော်ဝါရီ (၂၅) ရက်နေ့မှစ KIA/KPDF များက ထိုးစစ်ဆင်တိုက်ခိုက်လျက်ရှိရာ မတ်လ(၃)ရက်နေ့က ဖားကန့်-နမ့်မှော်ကျေးရွာ သံသုံးတောင်ဘက်မှ တာမခံဘက်သို့ အင်အား (၆၀)ခန့်ရှိ တပ်ကူစစ်ကောင်စီ၏ စစ်ကြောင်းကို တာမခံကျေးရွာဘုန်းကြီးကျောင်းအတွင်း တပ်စွဲထားချိန် မတ်လ (၄) ရက်နေ့က KIA/KPDF မှ ချေမှုန်းတိုက်ခိုက်နိုင်ခဲ့ကြောင်း သိရသည်။

“ဒီနေ့မနက် ၈ နာရီ သတင်းအရ စကစရဲ့ တပ်ကူလာတဲ့ (၆၀)လောက်ကို ချေမှုန်းနိုင်ခဲ့တယ်၊ (၆၀ မမ)စိန်ပြောင်း၊ လက်ထောက်စက်လက်နက်ငယ်ရယ်ဆက်စပ် စစ်အသုံးအဆောင်ပစ္စည်းတွေနဲ့ ကွန်ပျူတာတစ်လုံးရတယ်၊ ထွက်ပြေးတဲ့ ဆယ်ယောက်လောက်ကို လိုက်လံရှင်းလင်းရေး ဆောင်ရွက်နေတယ်”ဟု ဆိုသည်။

လက်ရှိတာမခံကျေးရွာ၏အခြေအနေသည် စစ်ကောင်စီ၏ ပြည်သူ့စစ်နှင့်ရှမ်းနီတပ်မှ ရံဖန်ရံခါ မီးလိုက်ရှို့နေခြင်း လေယာဉ်ဖြင့် မီးလောင်ဗုံးကျဲနေခြင်းတို့ကြောင့် စာသင်ကျောင်း၊ ဘုန်းကြီးကျောင်းအပါ ရွာ၏သုံးပုံနှစ်ပုံခန့် မီးလောင်ပျက်စီးသွားပြီး၊ ယမန်နေ့ညကလည်း ရဟတ်ယာဉ်ဖြင့် လာပစ်ခဲ့သေးကြောင်း ဒေသခံများထံမှ သိရသည်။

ဖားကန့်မြို့နှင့်မိုးကောင်းမြို့သွား အချက်အချာ နမ့်တိန်းဒေသနှင့် ဖားကန့်မြို့နှင့် ဟိုပင်၊ မိုးညှင်းမြို့သွား ဝှေခါဒေသအား တော်လှန်ရေးအင်အားစုများက ပိတ်ဆို့ထားနိုင်ပြီး ယခုတိုက်ပွဲဆင်နွှဲနေသည့် ကချင်ပြည်နယ်နှင့် စစ်ကိုင်းအစပ် တာမခံဒေသအား ရရှိပါက ဖားကန့်မြို့နယ်၏ အဓိက ဝင်ထွက်ပေါက်များကို KIA တပ်မဟာ (၉)၏ တပ်ရင်း (၆)၊ တပ်ရင်း (၄၄)၊ တပ်ရင်း (၃၁)၊ တပ်ရင်း (၂၆)တို့နှင့်အတူ KPDF များက အတိုင်းအတာတစ်ခုအထိ ထိန်းချုပ်နိုင်သည့် အခြေအနေဖြစ်သည်။

လက်ရှိ စစ်ကောင်စီ၏ တာမခံအထိုင်စခန်းတွင် တပ်ရင်းမှူး အပါ အင်အား (၃၀)မှ (၅၀) ကြား ရှိနေနိုင်သေးပြီး အခိုင်အမာ ကတုတ်ကျင်းများထဲမှ ခုခံနေကာ KIA/KPDF မှ ပိတ်ဆို့တိုက်ခိုက်လျက်ရှိနေဆဲဖြစ်သည်။