စစ်ကောင်စီလက်အောက်ခံ ကာကွယ်ရေးဝန်ကြီးဌာန၏ ဒုတိယဝန်ကြီးအသစ်အဖြစ် ဗိုလ်ချုပ်ကိုလေးကို ခန့်အပ်တာဝန်ပေးကြောင်း စစ်ကောင်စီက မေလ ၂၈ ရက်နေ့ ညပိုင်းတွင် ကြေညာသည်။
ဖမ်းဆီးခံရပြီး ယခုမေလအတွင်း ထောင်ဒဏ်ချမှတ်ခံလိုက်ရကြောင်း သတင်းထွက်ပေါ်နေသည့် ကာကွယ်ရေးဝန်ကြီးဌာန ဒုတိယဝန်ကြီး ဗိုလ်ချုပ် အောင်လင်းထွန်းနှင့် ပတ်သက်၍မူ စစ်ကောင်စီက သီးသန့်ထုတ်ပြန်ခြင်း မရှိပေ။
ဗိုလ်ချုပ်အောင်လင်းထွန်းသည် စစ်တပ်အာဏာသိမ်းပြီးနောက် ၂၀၂၁ ခုနှစ် မေလထဲတွင် ကာကွယ်ရေးဝန်ကြီးဌာန ဒုတိယဝန်ကြီးဖြစ်လာခြင်းဖြစ်သည်။
၎င်းကို အွန်လိုင်းလိမ်လည်မှု (ကျားဖြန့်) လုပ်ငန်းများနှင့် ပတ်သက်ပြီး ပြီးခဲ့သည့် မတ်လအတွင်းက စစ်ကောင်စီက ဖမ်းဆီးစစ်ဆေးခဲ့ခြင်းဖြစ်ကြောင်း ပြည်တွင်းသတင်းဌာနများတွင် ဖော်ပြခဲ့ကြသည်။
လက်ရှိ ဗိုလ်ချုပ်အောင်လင်းထွန်းနေရာတွင် အသစ်ခန့်အပ်လိုက်သည့် ဗိုလ်ချုပ် ကိုလေးသည် ဒုတိယတပ်မတော်လေ့ကျင့်ရေးအရာရှိချုပ်အဖြစ် တာဝန်ထမ်းဆောင်ခဲ့သူဖြစ်သည်။
ဗိုလ်ချုပ် ကိုလေးသည် NLD အစိုးရလက်ထက် ၂၀၂၀ ပြည့်နှစ်တွင် စွမ်းဆောင်မှုဆိုင်ရာ ဂုဏ်ထူးဆောင်ဘွဲ့ဖြစ်သည့် ဇေယျကျော်ထင်ဘွဲ့ ရရှိခဲ့ဖူးသည်။
ယခုရက်ပိုင်းအတွင်း စစ်ကောင်စီက အပြောင်းအလဲအချို့ ပြုလုပ်နေပြီး ယမန်နေ့ မေလ ၂၇ ရက်နေ့ကလည်း စစ်ကောင်စီဉက္ကဋ္ဌရုံးဝန်ကြီးဌာန (၃) ၏ ဝန်ကြီး ဦးအောင်နိုင်ဦးနှင့် စီမံကိန်းနှင့် ဘဏ္ဍာရေးဝန်ကြီးဌာန ဒုတိယဝန်ကြီး ဦးမောင်မောင်ဝင်းတို့ကို ရာထူးက ထုတ်ပယ်ခဲ့သည်။
Leave a Reply