ဆရာတော်ကို စစ်တပ်က ပစ်သတ်မှု နိုင်ငံတစ်ဝန်း သံဃာတော်များ အကြား ရိုက်ခတ်မှု ပြင်းထန်နေ

ပဲခူးမြို့၊ ဝင်းနိမ္မတာရုံကျောင်းတိုက် ဆရာတော်ကို စစ်တပ်က ပစ်သတ်မှု နိုင်ငံတစ်ဝန်း သံဃာတော်များ အကြား ရိုက်ခတ်မှု ပြင်းထန်နေ

ဗုဒ္ဓစာပေကျမ်းဂန် များစွာ ရေးသားခဲ့သော သာသနာ့ အာဇာနည် တစ်ပါး ဖြစ်ပြီး အစားထိုးမရသော ဆုံးရှုံးမှုဖြစ်၊ ရုပ်ကလပ်တော် ကျောင်းပြန်ရောက်

နိုင်ငံတော်သံဃာ့မဟာနာယကအဖွဲ့ ဆရာတော် တစ်ပါးဖြစ်သော ပဲခူးမြို့၊ ဝင်းနိမ္မတာရုံကျောင်း တိုက်ဆရာတော် ဘဒ္ဒန္တမုနိန္ဒာဘိဝံသ ကို စစ်တပ်က ပစ်သတ်လိုက်မှုကြောင့် သံဃာလောကအတွင်း ရိုက်ခတ်မှုပြင်းထန်နေကြောင်း နာမည်ကျော် ဓမ္မကတိက ဆရာတော်တချို့က မိန့်ကြားသည်။

ဇွန်လ ၁၉ ရက်နေ့ နံနက် ၁၀ နာရီအချိန် မင်္ဂလာဒုံမြို့နယ်၊ ကန်သုံးဆင့်၊ ပရိယတ္တိစာသင်တိုင် ဆရာ တော် ဘဒ္ဒန္တဂုဏိကာဘိဝံသနှင့် ပဲခူးမြို့ ဝင်းနိမ္မိတာရုံကျောင်းတိုက်ဆရာတော် ဘဒ္ဒန္တမုနိန္ဒာဘိဝံသတို့သည် မန္တလေးမြို့ ၊ မဟာဝိသုဒ္ဓါရုံတိုက်သစ်(ရွှေကျင်နိကာယဗဟိုဌာန)တွင် ဇွန်လ ၂၀ ရက်နေ့ ကျင်းပပြုလုပ်မည့် ရွှေကျင်နိကာယဗဟိုဌာန အစည်းအဝေး တက်ရန် ရန်ကုန်မြို့မှ လေယာဉ်ဖြင့် တံတားဦးလေဆိပ်သို့ ကြွရောက်ခဲ့ကြောင်း ၊ ယင်းနောက် ကံသုံးဆင့် ဆရာတော်ဇာတိဖြစ်သော ငါန်းဇွန်မြို့နယ်၊ ပန်းချီကမ္မရွာသို့ ကားဖြင့် သွားရောက်ပြီး ဆွမ်းစားရန် သွားရောက်စဉ် မြို့သာနှင့် ပန်းချီ ကမ္မရွာ အကြား လုံခြုံရေးကင်းလှည့်နေသူ(စစ်ကောင်စီတပ်)များ နှင့်တွေ့ရှိ၍ ကားကိုရပ် တန့်ခိုင်းရာ မှန်မချဘဲ ကားကိုမောင်းနှင်သွားသည့်အတွက် လုံ ခြုံရေးတပ်များက ပစ်ခတ်ခဲ့ကြောင်း၊ ထိုသို့ ပစ်ခတ်မှုကြောင့် ပဲခူးမြို့ ဝင်းနိမ္မိတာရုံကျောင်းတိုက်ဆရာတော် ဘဒ္ဒန္တမုနိန္ဒာဘိဝံသ ပျံလွန်တော်ခဲ့ပြီး ကံသုံးဆင့်ဆရာတော်မှာ ပွန်းပဲ့ဒဏ်ရာရရှိကြောင်း၊ ဆရာတော်၏ ယာဉ် မောင်းမှာ လက်ခြေတို့တွင် ကျည်ဆန်ထိမှန်ခဲ့ကြောင်း သိရှိရသည်။

“သက်တော် ၅၀ တန်း ဆရာတော်၊ သံဃာတော်တွေ အားလုံးက ဆရာတော်ကြီး ဘဒ္ဒန္တမုနိန္ဒာဘိဝံသ ရေး သားတဲ့ ဗုဒ္ဓသာသနာ့ စာပေ ကျမ်းဂန်တွေနဲ့ ဖတ်ရှုပြီး စာမေးပွဲတွေ ဖြေခဲ့ကြရတယ်။ သာသနာတော်အတွက် အင်မတန်မှ ကျေးဇူးတရားကြီးမားတဲ့ ဆရာတော်ကြီးလည်းဖြစ်ပါတယ်။ ဗုဒ္ဓသာသနာ တော်ကြီးတစ်ခုလုံးအတွက် အင်မတန်မှ ဆုံးရှုံးမှု ကြီးမားပါတယ်” ဟု နာမည်ကျော် ဓမ္မကထိက ဆရာတော်က မိန့်ကြားသည်။

ပဲခူးမြို့ ဝင်းနိမ္မိတာရုံကျောင်း တိုက်ဆရာတော် ဘဒ္ဒန္တမုနိန္ဒာဘိဝံသကို စစ်တပ်က ပစ်ခတ်ခဲ့၍ ပျံလွန်တော်မူခဲ့ကြောင်း နိုင်ငံတစ်ဝန်းရှိ သံဃာတော်များ သိရှိထားကြပြီး ထိုသို့ သိရှိမှုမှာလည်း မျက်မြင် သက်သေဖြစ်သော ကန်သုံးဆင့် ဆရာတော်ကြီးနှင့်ပတ်သက်ဆက်နွယ်သော စာသင်တိုက်များ၊ တပည့် သံဃာတော်များ၊ ရွှေကျင်ဂိုဏ်း (ရွှေကျင်နိကာယ) မှ ဆရာတော်ကြီးများကိုယ်တိုင် ကန်သုံးဆင့် ဆရာတော်ကြီး ထံဆက်သွယ်၍ အတည်ပြုခဲ့ကြခြင်းဖြစ်ကြောင်း ပြောဆိုသည်။

“ဆရာတော်ကြီးက အခုလို ပျံလွန်တော်မူရတာက အင်မတန်မှ ဝမ်းနည်းဖို့ကောင်းတယ်။ ပြုသူဘယ်သူ ဆိုတာလည်း တစ်နိုင်ငံလုံး သံဃာတော်တွေသိကြပါတယ်။ သူတို့ (စစ်တပ်) သတင်းထုတ်ပြန်တာတွေတော့ ပြောမနေပါနဲ့တော့” ဟု ပဲခူးမြို့မှ ဆရာတော်ကြီး၏ တပည့် စာချကိုယ်တော်က မိန့်ကြားသည်။

လက်ရှိ မဘသနှင့် အမျိုးသားရေး ဘုန်းကြီးတချို့ကလည်း နိုင်ငံတော်သံဃာမဟာနာယက ဆရာ တော်ကြီးကို စစ်တပ်က ပစ်ခတ်ခဲ့သောကြောင့် ပျံလွန်တော်မူခဲ့ကြောင်း သိရှိလက်ခံထားကြပြီး စစ်တပ်၏ လိမ်လည် သတင်းထုတ်ပြန်မှုအပေါ် မှတ်ချက်မပေးလိုဘဲ နှုတ်ဆိတ်နေကြကြောင်း သိရှိရသည်။

ယနေ့ ဇွန်လ ၂၀ ရက်နေ့ နံနက် ၄ နာရီအချိန်တွင် ဆရာတော်ကြီး၏ ရုပ်ကလပ်တော်သည် ပဲခူးမြို့ ဝင်းနိမ္မိတာရုံစာသင်တိုက်သို့ ပြန်လည် ရောက်ရှိလာပြီဖြစ်ကြောင်း သိရှိရသည်။

သီတဂူဆရာတော် တရားပွဲ Live မှ အောက်က ရဟန်းတော်တစ်ပါးရဲ့ မန့်လေးကို ကူးယူဖော်ပြလိုက်ပါ၏

ထိရှလွန်းပါသည် ။

အရှင်ဘုရား…
အရှင်ဘုရားထောက်ခံအားပေးပြီး
ရေလောင်းလိုက်တဲ့ အပင်ကြီး
အရမ်းကို ကြီးထွားသွားပါပြီ…

ထိုအပင်က အရိပ်မဖြစ်ဘဲ
အဆိပ်ဖြစ်သွားတာကိုရော
အရှင်ဘုရား သိပါလေစွဘုရား…

အရှင်ဘုရား ရေလောင်းလိုက်လို့
ထိုအဆိပ်ပင်ကြီး ကြီးလာတာ
အရှင်ဘုရား ကျေနပ်သလား..?
အရှင်ဘုရား ဝမ်းသာသလား..?

တပည့်တော်တို့လည်း ပိဋကတ်တော်
ဓမ္မစာပေ သင်ရုံနဲ့ မလုံလောက်
တော့ဘူး ဘုရား
တရုတ်စာ တရုတ်စကားတွေပါ
သင်ထားရတော့မှာပါ ဘုရား…

အဆိပ်ပင်ကြီး ကြီးထွားလာတာ
အရှင်ဘုရား ကျေနပ်မယ်ဆိုရင်
တပည့်တော်တို့လည်း
ဆုတောင်းရတော့မှာပါ ဘုရား…

ဒီဘဝ ဒီခန္ဓာဟာ…
မြန်မာပြည်မှာ လူဖြစ်ရခြင်းနဲ့
အတွေးအခေါ်လွဲမှား
အသိဉာဏ်နုံနည်းလွန်းတဲ့
အစွန်းရောက်ဘာသာရေး
ခေါင်းဆောင်တွေရဲ့
တပည့်ဖြစ်ရခြင်းဟာ
ဒီဘဝနောက်ဆုံးဖြစ်ရပါလို၏
ဘုရား…

ဒီစာကို မျက်ရည်တွေကျပြီး
ရေးနေပါတယ်ဘုရား…

ဆန်းလပမာချမ်းမြသာယာရှိပါစေ…

Anyatara Bhikkhu Neminda