အုတ်တွင်းမြို့ပေါ်ရှိ စစ်တပ် တပ်စွဲထားသော နေရာ ၄ ခုနှင့် မြို့စိုးတံတား စစ်တပ် ဂိတ်တို့ကို တိုက်ခိုက်

အုတ်တွင်းမြို့ပေါ်ရှိ စစ်တပ် တပ်စွဲထားသော နေရာ ၄ ခုနှင့် မြို့စိုးတံတား စစ်တပ် ဂိတ်တို့ကို တိုက်ခိုက်မှု စစ်ကောင်စီ တပ်သား ၁ ဦးသေဆုံး

ပဲခူးတိုင်း၊ အုတ်တွင်းမြို့ပေါ်ရှိ အကြမ်းဖက် စစ်တပ် တပ်စွဲထားသော နေရာ ၄ ခုကို တော်လှန်ရေး တပ်ဖွဲ့များက ဝင်ရောက် တိုက်ခိုက်ရာ စစ်ကောင်စီ တပ်သား ၁ ဦး သေဆုံးပြီး ၄ ဦး ပြင်းထန်ဒဏ်ရာရရှိခဲ့ကြောင်း အုတ်တွင်းမြို့နယ် ပြည်သူ့ကာကွယ်ရေးအဖွဲ့မှတာဝန်ရှိသူ တစ်ဦး ပြောဆိုသည်။

နိုဝင်ဘာလ ၂၅ ရက်နေ့မှ ဒီဇင်ဘာလ ၆ ရက်နေ့ အထိ အုတ်တွင်းမြို့ပေါ်တွင် အကြမ်းဖက် စစ်တပ် တပ်စွဲထားသော မြို့နယ်ရဲစခန်း၊ ထွေအုပ်ရုံး၊ စီးပွားရေးဘဏ်နှင့် မြို့‌တောင်ဘက်အထွက်ရှိ စစ်ဆေးရေးဂိတ် တို့ကို ဝင်ရောက် တိုက်ခိုက်ခဲ့ခြင်းဖြစ်ကြောင်း သိရသည်။

ယင်းတိုက်ခိုက်မှု အတွင်း ရဲတပ်ကြပ် ၁ ဦး သေဆုံးပြီး စစ်ကောင်စီ တပ်သား ၄ ဦးပြင်းထန်ဒဏ်ရာရကာ လက်ရှိချိန်တွင် နေပြည်တော်ကို ပို့ဆောင်၍ ဆေးကုသမှု ခံယူနေရကြောင်း သိရှိရသည်။

တိုက်ခိုက်မှု အတွင်း ပြည်သူများနှင့် စစ်ရေးပစ်မှတ် မဟုတ်သော ဝန်ထမ်း မိသားစုဝင်များ ထိခိုက်မှုမရှိစေရန် သတိကြီးစွာ ဆောင်ရွက်ခဲ့ပြီး ပြည်သူများ အနေဖြင့်လည်း အကြမ်းဖက် စစ်ကောင်စီ တပ်သားများနှင့် အနီးကပ်၍ အထူးသတိပြု နေထိုင်ကြရန် အုတ်တွင်းမြို့နယ် ပြည်သူ့ကာကွယ်ရေးအဖွဲ့မှတာဝန်ရှိသူ တစ်ဦး ပြောဆိုသည်။

အဆိုပါ တိုက်ခိုက်မှုကို အုတ်တွင်းမြို့နယ် ပြည်သူ့ကာကွယ်ရေးအဖွဲ့နှင့် ပြည်သူ့ကာကွယ်ရေးတပ်မတော်၊ တောင်ငူခရိုင် အမှတ် ၂ တပ်ရင်း၊ Delta One Drone တပ်ဖွဲ့တို့က ပူးပေါင်း လုပ်ဆောင်ခဲ့ကြောင်း သိရှိရသည်။

အလားတူ အောက်တိုဘာ ၇ ရက်နေ့ကလည်း အုတ်ဖိုမြို့နယ်၊ မြို့စိုးတံတားပေါ်ရှိ အကြမ်းဖက် စစ်တပ် စစ်ဆေးရေးဂိတ်ကို တော်လှန်ရေး တပ်ဖွဲ့များက ဒရုန်းဖြင့် ဗုံးကျဲ တိုက်ခိုက်ခဲ့ကြောင်း သိရသည်။

ယင်း တိုက်ခိုက်မှုအတွင်း အကြမ်းဖက် စစ်ကောင်စီ တပ်သားများ ထိခိုက်သေဆုံးမှုအခြေအနေကို အတည်ပြုနိုင်ခြင်းမရှိသေးကြောင်း၊ ထို တိုက်ခိုက်မှုကို အုတ်တွင်းမြို့နယ် ပကဖ Drone အဖွဲ့နှင့် တပ်ရင်း(၃၅၀၂) Deltaone drone forceတို့က ပူးပေါင်း လုပ်ဆောင်ခဲ့ကောင်း သိရှိရသည်။