မံစီမြို့နယ်၊ တမော်ကျေးရွာအုပ်စုရှိ စစ်ကောင်စီတပ်၏ မဂျီဂုံဗျူဟာကုန်းကို ကချင်လွတ်မြောက်ရေးတပ် (KIA) နှင့် PDF ပူးပေါင်းတပ်က ယနေ့ မွန်းလွှဲ နှစ်နာရီကျော်က တိုက်ခိုက်သိမ်းပိုက်ခဲ့ကြောင်းသိရသည်။
မဂျီဂုံဗျူဟာကုန်းရှိ တပ်စခန်းကုန်းသုံးနေရာကို သိမ်းပိုက်ခဲ့ခြင်းဖြစ်ပြီး စစ်ကောင်စီတပ်၏ ဟောင်ဝစ်ဇာအမြောက်နှစ်ခုကိုလည်း သိမ်းဆည်းရရှိခဲ့သည်ဟု အမည်မဖော်လိုသူ ရှေ့တန်းသတင်းရင်းမြစ်ကပြောသည်။
“ဟောင်ဝစ်ဇာနှစ်လက်နဲ့ ဟောင်ဝစ်ဇာကျည်ဆံအများကြီးတော့ရထားတယ်။ မဂျီဂုံဗျူဟာဆိုတာက တြိဂံပုံစံ တောင်ကုန်း သုံးခုပေါ့။ တောင်သုံးတောင်စလုံးသိမ်းထားနိုင်ပြီ” ဟုပြောသည်။
စခန်းသိမ်းတိုက်ပွဲအတွင်း KIA ပူးပေါင်းတပ်ဖွဲ့ဝင်တစ်ဦး ကျဆုံးခဲ့ကာ ၁၀ ဦးကျော် ထိခိုက်ဒဏ်ရာရရှိခဲ့ပြီး စစ်ကောင်စီတပ်ဖွဲ့ဝင်များက လက်နက်နှင့်အတူစခန်းကို စွန့်ခွာထွက်ပြေးသွားကြောင်းသူကဆက်ပြောသည်။
“စစ်ကောင်စီ အလောင်းကတော့ တစ်လောင်းမှ မရလိုက်ဘူး။ ဒဏ်ရာပဲရသွားကြတာ။ တော်တော်များများက ထွက်ပြေးသွားကြတာလေ။ အကုန်ပြေးသွားကြတာ ဘယ်သူမှ မရှိတော့ဘူး။ တခြားလက်နက်တွေက သူတို့ယူပြီး ထွက်ပြေးသွားတာဆိုတော့ ဟောင်ဝစ်ဇာနဲ့ ကျည်ဆံတွေပဲရှိတော့တာ” ဟုပြောသည်။
အဆိုပါစစ်ကောင်စီစခန်းကို တစ်လခန့်ဝိုင်းဝန်းပိတ်ဆို့ကာ တိုက်ခိုက်ခဲ့ခြင်းဖြစ်ကြောင်း KIA တပ်ဖွဲ့ဝင်များနှင့် နီးစပ်သူတစ်ဦးက ပြောသည်။
“တိုက်ပွဲမဖြစ်ပေမဲ့ မဂျီဂုံကိုပိတ်ထားတာ တစ်လကျော်လောက်တော့ရှိပြီ။ ဘလောင်ဒိန်ဆာစခန်းကို သိမ်းပြီးကတည်းက ပိတ်ဆို့ထားတာဟုတ်တယ်။ ကျွန်တော်တို့ရဲ့အလံကိုလည်း အဲ့နေရာမှာ လွင့်တင်ထားနိုင်ပြီလို့လည်းကြားနေရတယ်” ဟုပြောသည်။
တိုက်ပွဲအတွင်း စစ်ကောင်စီတပ်က လေကြောင်းဖြင့် ဗုံးကြဲတိုက်ခိုက်ခဲ့မှုများစွာပြုလုပ်ခဲ့ကြောင်း သိရသည်။
မဂျီဂုံဗျူဟာကုန်းကို KIA ပူးပေါင်းတပ်က ပြီးခဲ့သည့် မတ်လ ၁ ရက်နေ့တွင် စတင်တိုက်ခိုက်ခဲ့ပြီး သုံးရက်အကြာတွင် တိုက်ခိုက်သိမ်းပိုက်ခဲ့ခြင်းဖြစ်သည်။
စကစ ၏ မဂျီဂုံစစ်ဗျူဟာကုန်းရှိ စခန်း ၃ ခုလုံးအား တပြိုင်တည်း တိုက်ခိုက်သိမ်းပိုက်ခဲ့
KIA ပူးပေါင်းတပ်ဖွဲ့တို့ တိုက်ခိုက်နေသည့် မံစီမြို့နယ်အတွင်းရှိ မဂျီဂုံစခန်းကုန်းကို ယနေ့ညနေက သိမ်းဆည်းရရှိကြောင်း သိရသည်။
မတ်လ ၁ ရက်နေ့ကစပြီး မံစီမြို့နယ်၊ တမော်ကျေးရွာနယ်မြေအတွင်းရှိ မဂျီဂုံ (Maji Gung) စခန်းကုန်း ၃ ခုလုံးကို တပြိုင်နက် စတင်တိုက်ခိုက်ခဲ့ပြီးနောက် ယနေ့ညနေတွင် အလုံးစုံသိမ်းပိုက်ရရှိခဲ့ခြင်းဖြစ်သည်ဟု မံစီမြို့နယ်အတွင်း လှုပ်ရှားနေသည့် KPDF တပ်ဖွဲ့ဝင်တစ်ဦးထံမှ သိရသည်။
“ညနေပိုင်းလောက်ဖြစ်မယ်။ ၃ နေရာပြိုင်တူ ဝင်တိုက်ရတာလေ။ တစ်နေရာပြီးမှ တစ်နေရာတိုက်ရင် ကိုယ့်ဘက်က အထိများမယ်”
၃ ရက်ကြာ တိုက်ခိုက်သိမ်းယူခဲ့ရသည့် မဂျီဂုံ (Maji Gung) ဗျူဟာစခန်းကုန်းတွင် ခလရ – ၁၀၂၊ ခလရ -၂၅၀ နှင့် ခမရ – ၄၂၇ ပူးပေါင်းတပ်တို့ စုပေါင်းတပ်ထိုင်ထားခြင်း ဖြစ်ကြောင်း သိရသည်။
စခန်းသိမ်းတိုက်ပွဲအတွင်း KIA အရာရှိတစ်ဦး ကျဆုံးခဲ့ပြီး KPDF တပ်ဖွဲ့ဝင် ၅ ဦး ထိခိုက်ဒဏ်ရာရခဲ့ကြောင်း သိရသည်။
ရှမ်းပြည်မြောက်ပိုင်းနှင့် ဆက်စပ်နေသည့် မံစီမြို့နယ်တွင် ယခုနှစ် ဇန်နဝါရီလကစပြီး KIA နှင့် မဟာမိတ်ပူးပေါင်းတပ်ဖွဲ့တို့ စခန်းသိမ်းတိုက်ပွဲများ ဖော်ဆောင်နေပြီး ဂိုက်ထိပ် (Kai Htik) စခန်းကုန်၊ ပလောင်ဒင်ဆာ (Balawng Dingsa) ကုန်း၊ စီခမ်းကြီးစခန်းနှင့် မံဝိန်းကြီးဒေသရှိ ရဲစခန်း၊ စစ်တပ်စခန်းကုန်းနှင့် နယ်စပ်စုပေါင်းဂိတ်တို့ကို သိမ်းပိုက်ထားနိုင်သည်။
Leave a Reply