Federal Wings ရဲ့ ကိုယ်ပိုင်ဒီဇိုင်းအသစ်နဲ့ ဒရုန်းများ အောင်မြင်စွာနဲ့ စတင်တိုက်ပွဲဝင်နေ…
တိုက်ပွဲအတွေ့အကြုံများ၊ မြေပြင်လိုအပ်ချက်များနဲ့ ပြုလွယ်ပြင်လွယ်မှုများကို ပေါင်းစပ်ပြီး လိုအပ်ချက်နဲ့ အကိုက်ညီဆုံးဖြစ်မယ့်အနေအထားကို ကိုယ်တိုင်ဒီဇိုင်းရေးဆွဲထုတ်လုပ်ထားတဲ့ ဒရုန်းများ အောင်မြင်စွာနဲ့ တိုက်ပွဲဝင်နေကြောင်း Federal Wings ဒရုန်းတပ်ဖွဲ့က ဒီနေ့ ထုတ်ပြန်ပါတယ်။
Federal Wings ဒရုန်းအဖွဲ့ရဲ့ R&D အဖွဲ့များ ဒီဇိုင်းဆွဲထုတ်လုပ်ထားတဲ့ ကိုယ်ပိုင်ဒီဇိုင်းသစ်နဲ့ ဒရုန်းများဟာ တည်ဆောက်မှုပုံစံ ရိုးရှင်းပြီး တပ်ဆင်ရမြန်ဆန်လွယ်ကူတဲ့အပြင် ပါဝင်တဲ့အစိတ်အပိုင်းများ နည်းပါးသွားတာကြောင့် အရင်ကိုယ်ထည်များထက် ၂၅% ခန့် ပိုမိုပေါ့ပါးတယ်လို့ သိရပါတယ်။
လမ်းပန်းခက်ခဲတဲ့ဒေသတွေမှာ ကျောပိုးပြီးသယ်ဆောင်သွားလို့ရအောင် ဒီဇိုင်းထုတ်ထားပြီး အရင်ကတော့ Federal Wings အနေနဲ့ စိုက်ပျိုးရေးသုံးဒရုန်းကိုယ်ထည်များကို မှာယူပြီး တိုက်ပွဲမှာအသုံးပြုဖို့ ထပ်ပိုးပြင်ဆင်ခဲ့ကြတာဖြစ်တာကြောင့် မလိုအပ်တဲ့ထပ်တိုးအလေးချိန် များပြားခဲ့ရပြီး ဒရုန်းတစ်စင်းဆီက ရသင့်တဲ့စွမ်းရည်ကို အပြည့်အဝအသုံးမချနိုင် ဖြစ်ခဲ့တယ်လို့ သိရပါတယ်။
အောက်မှာဖော်ပြထားတဲ့ ဓာတ်ပုံများထဲက ပထမဆုံး ၄ ပုံဟာ FW ရဲ့ ကိုယ်ပိုင်ဒီဇိုင်းအသစ်နဲ့ ဒရုန်းများဖြစ်ပြီး နောက်ထပ် ၄ ပုံကတော့ FW ရဲ့ ပထမမျိုးဆက်ဒရုန်းများဖြစ်ကာ နောက်ဆုံး ၃ ပုံကတော့ ဒုတိယမျိုးဆက်ဒရုန်းများဖြစ်တယ်လို့ Federal Wings က ဖော်ပြထားပါတယ်။