ဝိုင်း​မော်မြို့မှ ​ဒေသခံပြည်သူအများစု မြို့မှထွက်​ပြေးတိမ်း​ရှောင်

“KIAတွေက မြို့ထဲကိုမဝင်ဘူး။ ရဲစခန်းဝင်လုံးရင် ကြာလှ နာရီဝက်ပဲ။ ဒါပေမဲ့မြို့နာမှာစိုးလို့ မြို့နားကိုမကပ်ဘူး။ ကျနော်တို့ကြောက်ရတာက စစ်တပ်ကသူတို့စခန်းတွေမရှိတော့ရင် မြို့ကိုဖျက်ဆီးပစ်မှာကိုပဲ”-​ဒေသခံတစ်ဦး

စစ်​ဘေး​ရှောင်ပြည်သူအများစုမြစ်ကြီးနားသို့တိမ်း​ရှောင်

ခလရ (၅၈)​ရှေ့လမ်းနှင့် ဗန်​မော်ဘက်အထွက်လမ်းကို စစ်​ကောင်စီတပ်ပိတ်ဆို့

ဝိုင်းမော်မြို့၌ တပ်ရင်းတစ်ခုသာ ထိန်းချုပ်ထားနိုင်တော့သည့် စစ်ကောင်စီ အန္တရာယ်​ကြောင့် ဝိုင်း​မော်ဒေသခံပြည်သူအများအပြားဘေးလွတ်ရာသို့တိမ်းရှောင်နေကြသည်။

“ဒီနေ့မနက် ပစ်ခတ်သံတွေမကြားရဘူး။ ဒါပေမဲ့ မြို့ခံတွေကတော့မနေရဲလို့ရှောင်နေကြတယ်။ အချိန်မှီလည်းရှောင်သင့်တယ်။ စစ်တပ်ကမြို့အထွက်တွေကိုလိုက်ပိတ်နေတယ်။ အချိန်ရတုန်းမှာ ရှောင်ထားသင့်ပါတယ်။ တိုက်ပွဲကဖြစ်မှာလို့ ကျနော်တို့နားလည်ထားတယ်”ဟု ဝိုင်း​မော်မြို့ခံတစ်ဦးကပြောသည်။

ဝိုင်းမော်မြို့ရှိ စစ်ကောင်စီစခန်းများကို တိုက်ခိုက်နေသည့် ကချင်လွတ်လပ်ရေးတပ်မတော်(KIA)နှင့် PDF ပူးပေါင်းတပ်ဖွဲ့များက ယမန်နေ့(မေလ ၂၁ရက်) ညတွင် အမှတ် ၃၂၁ ​ခြေမြန်တပ်ရင်း (ခမရ-၃၂၁)ကို ထပ်မံသိမ်းပိုက်ခဲ့သည်။KIA သည် ဝိုင်းမော်မြို့နယ် ရွှေညောင်ပင်၊ ဝ ထောင်ဘွမ်၊ ကဇူး၊ ဂါးရာယာန်၊ ဒဘတ် ရွာတို့မှစခန်းများအပါအဝင် စစ်ကောင်စီရှေ့တန်းစခန်းများကိုလည်း သိမ်းယူထားပြီး ယခုအခါ ဝိုင်းမော် – ကန်ပိုင်တီလမ်းကြောင်းပေါ်မှ

အမှတ် ၅၈ ​ခြေလျင်တပ်ရင်း( ခလရ-၅၈)သာ ကျန်တော့သည်။

ထိုအ​ခြေအ​နေတွင် စစ်​ကောင်စီက မြို့ကိုလေကြောင်းနှင့်လက်နက်ကြီးအသုံးပြုတိုက်ခိုက်အကြမ်းဖက်နိုင်​သော​ကြောင့် ​ဒေသခံပြည်သူများ မြို့ကို စွန့်ခွာထွက်​ပြေး​နေကြခြင်းဖြစ်သည်။စစ်ကောင်စီတပ်က ​မေ ၂၂ ရက်က အတွဲလိုက်ဒုန်းများဖြင့် ဝိုင်းမော်မြို့ကို ပြင်းပြင်းထန်ထန်ပစ်ခတ်ခဲ့သည်။ သို့သော် အရပ်သားထိခိုက်မှုသတင်းမကြားရကြောင်း မြို့ခံများကပြောသည်။ မေလ ၁၉ရက်နှင့် မေလ ၂၁ရက်က လက်နက်ကြီးပစ်ခတ်မှုတွင် အရပ်သားခြောက်ဦးသေဆုံးပြီး ၂၀ဦးခန့်ဒဏ်ရာရခဲ့ကြောင်း သတင်းရရှိသည်။

စစ်​ကောင်စီတပ်ကခမရ (၃၂၁) မှ ဆုတ်ခွာခဲ့ရပြီး ခလရ(၅၈)ကို ခံစစ်ပြင်ဆင်ထားကြောင်း စစ်​ကောင်စီဝါဒဖြန့် တယ်လီဂရန်ချန်နယ်များက ​ရေးသား​နေကြသည်။

“အခုက မြစ်ကြီးနားအဝင် မလမင်းထင်တံတားကိုမပိတ်သေးပေမယ့် ဗန်းမော်ဘက်ကိုအထွက်လမ်းတွေ၊ခလရ(၅၈)ကို ဖြတ်သွားတဲ့လမ်းတွေကို စစ်တပ်ကပိတ်ထားတယ်။ ထွက်လို့ရတုန်းမှာထွက်ထားဖို့လိုတယ်။ သူတို့(စစ်ကောင်စီ)ကလူသားတံတိုင်းအနေနဲ့ အသုံးချမှာစိတ်ပူရတယ်” ဟု မြစ်ကြီးနားမြို့သို့ရောက်ရှိနေသည့် စစ်ဘေးရှောင်တဦးကသူ့အမြင်ကိုပြောသည်။

ယခုအခါ ဝိုင်း‌​မော်မြို့မှ ဒေသခံအများအပြားသည် စစ်ဘေးတိမ်းရှောင်ရန် မြစ်ကြီးနားမြို့၌ ရောက်ရှိနေကြသည်။ စစ်ဘေးရှောင်စခန်း သီးခြားမဖွင့်လှစ်သေးသော်လည်း ဘုန်းကြီးကျောင်းများနှင့် ဘာသာရေးအဆောက်အအုံများ၊ ဆွေမျိုးများနေအိမ်၌ နေရာချထားကြောင်း ကူညီကယ်ဆယ်ရေးလုပ်ဆောင်နေသူများကပြောသည်။

“ဆွေမျိုးတွေအိမ်မှာနေကြတယ်။ ခြံလွတ်တွေထဲမှာလည်း ယာယီတဲတွေနဲ့နေကြတယ်။ မြို့ခံတွေက ဝိုင်းဝန်းကူညီကြဖို့ အချင်းချင်းလည်း ဆော်သြနေကြပါတယ်” ဟု မြစ်ကြီးနားမြို့ခံတစ်ဦးကပြောသည်။

လတ်တလောစစ်ဘေးရှောင်နေရသည့်အရေအတွက်ကိုမသိရှိရသေးသော်လည်း အနည်းဆုံး ငါးသောင်းထက်မနည်းရှိနိုင်သည်ဟု ဝိုင်း မော်မြို့ခံတဦးကပြောသည်။

လက်တလော၌ စစ်ဘေးရှောင်များအတွက်အလိုအပ်ဆုံးမှာ ယာယီတဲများထိုးရန် မိုးကာစဖြစ်ကြောင်း မြစ်ကြီးနားမြို့ခံတစ်ဦးကပြောသည်။ လက်ရှိကြုံနေကြရသည့်အခက်အခဲကို ဒေသအနှံ့မှပြည်သူအချင်းချင်း ဝိုင်းဝန်းကူညီကြရန်လည်း စစ်ဘေးရှောင်များနှင့်ဒေသခံများကတောင်းဆိုသည်။

ဝိုင်း‌​မော်မြို့ခံတစ်ဦးက “KIAတွေက မြို့ထဲကိုမဝင်ဘူး။ ရဲစခန်းဝင်လုံးရင် ကြာလှ နာရီဝက်ပဲ။ ဒါပေမဲ့မြို့နာမှာစိုးလို့ မြို့နားကိုမကပ်ဘူး။ ကျနော်တို့ကြောက်ရတာက စစ်တပ်ကသူတို့စခန်းတွေမရှိတော့ရင် မြို့ကိုဖျက်ဆီးပစ်မှာကိုပဲ” ဟု ပြောသည်။

(ဝိုင်း​မော်မြို့မှ မြစ်ကြီးနားမြို့သို့ထွက်​ပြေးတိမ်း​ရှောင်​နေ​သောပြည်သူများနှင့် ​ဘေးလွတ်မည်ထင်မည့်နေရာသို့ထွက်​ပြေး​တိမ်း​ရှောင်​နေ​သောဝိုင်း​မော်မြို့မှပြည်သူများ။ဓါတ်ပုံ-CJ)