မန္တလေးတိုင်း၊ ပြင်ဦးလွင်မြို့နယ်၊ နောင်ချိုမြို့နယ်အစပ်၊ ဝက်ဝံကျေးရွာမှာရှိတဲ့ စစ်ကောင်စီရဲ့ မူးယစ်ဆေးဝါး စစ်ဆေးရေးဂိတ်နဲ့ နယ်မြေရဲစခန်းကို တအာင်းအမျိုးသားလွတ်မြောက်ရေး တပ်မတော်(TNLA)က စတင်ထိုးစစ်ဆင်နေပြီလို့ မြေပြင်သတင်းအရင်းအမြစ်တွေက ပြောပါတယ်။
ဒီနေ့ ဇွန် ၂၈ ရက်နေ့ မနက် ၅ နာရီကတည်းက ထိုးစစ်ဆင်နေပြီး စစ်ကောင်စီဘက်ကလည်း ပြင်ဦးလွင်မြို့အထွက် ဧကတစ်သောင်းခြံကနေ လက်နက်ကြီးနဲ့ လှမ်းပစ်နေတာကြောင့် ဒေသခံအများစုဟာ တိမ်းရှောင်နေရတယ်လို့ ဆိုပါတယ်။
“သူတို့ မနက်အစောကတည်းက ထဆော်နေလို့ ဝက်ဝံရွာနဲ့ ဘန့်ဘွေးကျင်းရွာကလူတွေ ပြေးနေရတယ်။ မန္တလေးဘက် ပြေးကြတာပေါ့။ နောင်ချိုဘက်ကိုကျတော့ ဝင်လို့မရတော့ဘူးလေ။ တစ်လမ်းလုံးက တိုက်ပွဲ ဖြစ်နေတာ” လို့ မြေပြင်သတင်းအရင်းအမြစ်တစ်ဦးက ပြောပါတယ်။
လတ်တလောမှာ ပြင်ဦးလွင်မြို့ခံတွေဟာလည်း စိုးရိမ်စိတ်တွေကြောင့် ဗုံးခိုကျင်းကြိုတူးထားကြပြီး ဒီမနက်ပိုင်းကတည်းက မန္တလေးဘက်ကို ကားအစီးရေ ရာနဲ့ချီထွက်ခွါနေကြတယ်လို့ သိရပါတယ်။
“ပါအယ်၊ ထုံးကုန်း၊ ထုံးဘို ဘက်ကလူတွေလည်း ရှောင်ဖို့ ပြင်နေကြပြီ။ တကယ်ဖြစ်ရင် သူတို့ဆီ အရင်ဆုံးရောက်မှာ။ ပြင်ဦးလွင်က ဆိုင်တွေတော်တော်များများ ပိတ်ထားပြီ” လို့ အဝေးပြေးယာဉ်မောင်း တစ်ဦးက ပြောပါတယ်။
ဝက်ဝံစစ်ဆေးရေးဂိတ်နဲ့ စစ်တက္ကသိုလ်(DSA) အကွာအဝေးဟာ ကားနဲ့ နာရီဝက်ခန့်သာ ရောက်ရှိနိုင်ပြီး စစ်ကောင်စီရဲ့ ရာထူးကြီးပိုင်းတွေ နေထိုင်ကြတာကြောင့် ပြင်ဦးလွင်မြို့ကို ဒီနေ့မှာပဲ အင်အားအလုံးရင်းနဲ့ TNLA က ထိုးစစ်ဆင်နေတာပဲ ဖြစ်ပါတယ်။
Leave a Reply