မန္တလေးလုံခြုံရေး ဧရာဝတီမြစ်တွင်း စစ်သင်္ဘောဖြင့် ကင်းလှည့်

မန္တလေးမြို့အနီးထိ တိုက်ပွဲဖြစ်ပွားလာမှုကြောင့် စစ်ကောင်စီက လုံခြုံရေးပိုမိုတင်းကျပ်သည့်အနေဖြင့် ဧရာဝတီမြစ် အတွင်း၌ ဇူလိုင် ၁၇ ရက် ညနေပိုင်းမှစ၍ စစ်သင်္ဘော၊ အမြန်ကင်းလှည့်ရေယာဉ်များဖြင့် လှည့်လည် စောင့်ကြပ် နေကြောင်း ဒေသခံများထံက သိရသည်။

မရမ်းခြံဆိပ်ကမ်းအနီး နေထိုင်သူတဦးက “မြစ်ထဲမှာ စစ်သင်္ဘောတွေ၊ Speed Boat တွေနဲ့ ကင်းပတ်တာမျိုး အရင် ရက်တွေက မရှိဘူး။ မနေ့ကစပြီး တွေ့ရတာ။ ဂေါဝိန်ဆိပ်ကနေ သရက်တပင်ဆိပ်ဘက်ထိ ပတ်တာကို တွေ့ရတယ်၊ ဘာအကြောင်းနဲ့ ပတ်တာမျိုးလဲတော့ မသိဘူး၊ ဆိပ်ကမ်းမှာ ကပ်ထားတဲ့ စက်လှေတွေကိုတော့ မကြာမကြာ လက်နက် အပြည့်အစုံနဲ့လာပြီး စစ်ဆေးတာမျိုးတွေ ရှိနေတာကြာပြီ” ဟု ပြောသည်။

ကုန်းလမ်းမှ မန္တလေးမြို့တွင်းသို့ ဝင်နိုင်သည့် အရှေ့ဘက်ရှိ ၂၂ မိုင် ဇီးပင်ကြီး စစ်ဆေးရေးဂိတ်၊ ၁၆ မိုင် စစ်ဆေး ရေးဂိတ်၊ မြောက်ဘက်ရှိ ရွှေကျင်စစ်ဆေးရေးဂိတ်များအပြင် ချမ်းမြသာစည်မြို့နယ် မြရည်နန္ဒာတန်ဖိုး နည်းအိမ်ရာ အရှေ့ဘက်နှင့် မန္တလေး-ပြင်ဦးလွင်လမ်းပိုင်းပေါ်ရှိ ပုသိမ်ကြီးမြို့နယ် လက်ကောင်း၊ သလဲကုန်းရွာ ထိပ်တို့တွင် စစ်ကောင်စီက တပ်စွဲပြီး ခရီးသွားများကို စစ်ဆေး၍ ပိုက်စိပ်တိုက်ရှာဖွေခြင်းများနှင့်အတူ မြို့ပတ်လမ်းများပေါ်ထိ လုံခြုံရေး တင်းကျပ်ကာ ကင်းများအထပ်ထပ် ချထားပြီး မြို့တွင်း၌ ကားများဖြင့်ပါ ပတ်ကင်းလှည့်ခြင်းများ ပြုလုပ် နေရာမှ ယခုအခါ ရေကြောင်းကပါ ကင်းလှည့်ခြင်း၊ ကမ်းနားများတွင် ဆိုက်ကပ်ထား သည့် ပုဂ္ဂလိကရေယာဉ်များ၊ သစ်ဖောင်များ၊ တွဲသင်္ဘောများကိုလည်း စစ်ဆေးခြင်းများ လုပ်လာခြင်းဖြစ်သည်။

CDM ပြုလုပ်ထားသော တက္ကသိုလ်ကျောင်းဆရာတဦးက “မြစ်ထဲမှာ စစ်သင်္ဘောတွေ ကင်းပတ်လဲ စစ်ရေးအရ ဘာမှ လုပ်လို့ မရနိုင်ဘူး။ အခုလိုလုပ်ပြတယ်ဆိုတာ မြို့ခံတွေနဲ့ တော်လှန်ရေးအင်အားစုတွေ ခြောက်တာမျိုးလို့ပဲ သုံးသပ်ရ မှာပေါ့။ တကယ်တမ်းကျ မန္တလေးမြို့ကို စစ်ရေးအရ ကာကွယ်ဖို့ဆိုရင် ဧရာဝတီမြစ်က အရေးမပါဘူး၊ လက်ရှိ မတ္တရာ၊ စဉ့်ကူး၊ သပိတ်ကျင်းတို့ဆိုရင် ကျွန်းရွာတွေရှိတာပဲ။ ရေတပ်က သွားမှ မသွားရဲတာကို ကြည့်ပေါ့ဗျာ၊ ချင်းတွင်းမှာ လည်း ဒီအတိုင်းပဲ ရေတပ်က ဘာမှ လုပ်မရဘူး။ အဲဒါကြောင့် အခုလို လုပ်တာက ဟန်ရေးပြရုံ သက်သက်ပါပဲ” ဟု ပြောသည်။

ထို့ပြင် ဧရာဝတီမြစ်ကမ်းနား အနောက်တာရိုးနှင့် စိန်ပန်းအနောက်သင်္ဘောကျင်းဘက်တွင်လည်း ဇွန် ၂၆ ရက်မှ စတင် ပြီး အင်အားဖြည့်တင်းကာ လုံခြုံရေးတိုးမြှင့်မှုများ လုပ်ဆောင်ထားကြောင်း သိရသည်။

မတ္တရာမြို့နယ်ရှိ စက်လှေများကို ညောင်ကွဲဆိပ်ကမ်းတွင် ကမ်းကပ်ခွင့်မပေးတော့ဘဲ မော်တော်များကို ကမ်းအနီးနား သစ်ပင်၌ ကြိုးဖြင့်ချည်ခိုင်းပြီး မှတ်ပုံတင်များစစ်ဆေးခြင်း၊ လူကြီးထောက်ခံစာ၊ အိမ်ထောင်စုဇယားများကိုပါ တောင်း စစ်သည့်အပြင် မော်တော်များတွင် ရွာနာမည်နှင့် စစ်ကောင်စီတပ်ဖွဲ့ဝင်များ ချပေးထားသော နံပါတ်များကို ဆေးသုတ် ခိုင်းကာ ဖိအားပေးပြောဆိုမှုများလည်းရှိကြောင်း မော်တော်ပိုင်ရှင်များကို ဆိုသည်။

ထို့အတူ ဇူလိုင် ၁၆ ရက်ကလည်း အင်အား၂၀ ခန့်ပါ စစ်ကောင်စီတပ်များသည် မရမ်းခြံဆိပ်ရှိ လိုင်းမော်တော်ပိုင် ရှင်များကို စစ်ဆေးမေးမြန်းမှုများပြုလုပ်၍ မိုးကုတ်ဘက်မှလာသည့် စစ်ရှောင်များအား မသင်္ကာပါက ချက်ချင်း သတင်းပေးပို့ရန်နှင့် ဆန်၊ ဆီများကို မိုးကုတ်အထက်ပိုင်းသို့ ပေးမတင်ရန်ခြိမ်းခြောက်ပြောဆိုခြင်းများ ပြုလုပ်သွား ကြောင်း သိရသည်။

အဆိုပါအခြေအနေများအပေါ် စစ်ကောင်စီခန့် မန္တလေးတိုင်းအစိုးရအဖွဲ့မှ ပြောရေးဆိုခွင့်ရှိသူ စီးပွားရေးရာဝန်ကြီး ဦးသိန်းဌေး အား ဧရာဝတီမှ ဆက်သွယ်သော်လည်း ဆက်သွယ်၍ မရခဲ့ပေ။

ဇွန် ၂၅ ရက်မှ စတင်ခဲ့သည့် ၁၀၂၇ စစ်ဆင်ရေး အပိုင်း ၂ တိုက်ပွဲများသည် နောင်ချို၊ ကျောက်မဲ၊ မိုးကုတ်သာမက
မန္တလေးမြို့ မြောက်ဘက်ခြမ်းရှိ ပုသိမ်ကြီး၊ မတ္တရာမြို့နယ်များအထိ ပြင်းထန်လာရာ အလယ်ပိုင်းတိုင်း စစ်ဌာ နချုပ် (လပခ)အခြေစိုက်သည့် မန္တလေးမြို့ထိ တိုက်ပွဲများ ရောက်ရှိမလာနိုင်စေရေး ကြိုတင်ပြင်ဆင်မှုများ ပြုလုပ်ကာ ယခုကဲ့သို့ ဆောင်ရွက်နေခြင်းဖြစ်သည်။

မန္တလေးမြို့အနောက်ဘက်ခြမ်းတွင်ရှိသော ဧရာဝတီမြစ်တွင် အမရပူရမြို့နယ် ရွှေကြက်ယက်ဆိပ်ကမ်းမှ အောင်မြေ သာစံမြို့နယ် ညောင်ကွဲဆိပ်ကမ်းထိ ဆိပ်ကမ်း ၈ ခုထိ ရှိပြီး မန္တလေးဆိပ်ကမ်းမှ ဆန်၊ ကြက်သွန်၊ ဆီ၊ ဆား၊ ငရုတ်၊ ငပိ၊ ငါးခြောက်အပါအဝင် အဝတ်အထည်၊ လူသုံးကုန်၊ အလှကုန်ပစ္စည်းများကို ရန်ကုန်၊ မုံရွာ၊ ရွှေဘို၊ သပိတ်ကျင်း၊ ရွှေကူ၊ ကသာ၊ ထီးချိုင့်၊ ဗန်းမော်၊ မြစ်ကြီးနား စသည့်မြို့ကြီးများသို့ တင်ပို့လျက်ရှိသည်။

မန္တလေးမြို့ခံတဦးက “မန္တလေးမြို့ရဲ့ ဧရာဝတီဆိပ်ကမ်းတွေက တောင်ဘက် အမရပူရ ရွှေကြက်ယက်ဆိပ်ကမ်းကနေ စတွက်မယ်ဆိုရင် ရွှေကြက်ယက်၊ သဲဆိပ်၊ ချော်ဆိပ်၊ ဂေါဝိန်ဆိပ်၊ ထင်းဝင်းဆိပ်၊ မရမ်းခြံဆိပ်၊ ၂၂ လမ်းဆိပ်၊ ညောင် ကွဲဆိပ်ဆိုပြီး ရှိတယ်။ အဓိက လူစီးနဲ့ကုန်တင်တာက မရမ်းခြံ၊ ဂေါဝိန်၊ ထင်းဝင်တို့က နာမည်ကြီးဆိပ်ကမ်းတွေပဲ၊ သင်္ဘောကျင်းရယ် ရေကြောင်းနဲ့ ပတ်သက်တာတွေကလည်း မရမ်းခြံ၊ ဂေါဝိန်၊ ထင်းဝင်တို့မှာပဲ ရှိတယ်” ဟု ပြော သည်။

မန္တလေးဆိပ်ကမ်းမှ တခြားမြို့များသို့ ကုန်ပစ္စည်းများတင်ပို့သည့် ကုန်တင်သင်္ဘောအစင်းရေ ၄၀၀ ကျော်ရှိပြီး ခရီး သည်နှင့် ကုန်စည်တင်ဆောင် ပြေးဆွဲနေသည့် ရှပ်ပြေးရေယာဉ် အစင်းရေ ၃၀၀ ကျော်ရှိကြောင်း စစ်ကောင်စီ လက် အောက်ခံရေကြောင်းပို့ဆောင်ရေး ညွှန်ကြားမှုဦးစီးဌာန၏ စာရင်းများအရသိရပြီး လက်ရှိတွင် တိုက်ပွဲများနှင့်အတူ စက်သုံးဆီဈေး၊ ကုန်ဈေးနှုန်းကြီးမြင့်မှုများကြောင့် ထက်ဝက်ကျော်ခန့်မှာ ရပ်နားထားကြကြောင်း သိရသည်။