ကချင်ပြည်နယ်၊ ဝိုင်းမော်မြို့ ခလရ(၅၈) တပ်ရင်း ခြံစည်းရိုး၌ ထောင်ထားသည့်မိုင်း ပြန် နင်းမိသည့် စစ်ကောင်စီဒုတပ်ကြပ်တစ်ဦး ဒဏ်ရာအပြင်းအထန်ရရှိသွားသည်။
ခလရ(၅၈)မှ ဒုတပ်ကြပ်သိန်းအေးသည် ဇူလိုင် ၁၇ရက်က မိုင်းနင်းမိပြီး ခြေတစ်ဖက်ဖြတ် တောက်လိုက်ရသည်ဟု သတင်းရင်းမြစ်က ပြောသည်။
“ကိုယ်ထောင်တဲ့မိုင်း ကိုယ့်ဘာသာကိုယ်ပြန်နင်းမိတာ။ ယာမစိတ်ကြွဆေးတွေသုံးပြီး လျှောက် သွားရင်း မိုင်းထိတာ”ဟု ၎င်းက ပြောသည်။
ကချင်လွတ်လပ်ရေးတပ်မတော်(KIA)က စစ်ကောင်စီ၏ စခန်းအများအပြားတိုက်ခိုက်သိမ်းပိုက်ထားသည့်ဝိုင်းမော်မြို့တွင် ခလရ(၅၈)တပ်ရင်း တစ်ခုသာ ကျန်ရှိတော့သည်။
စစ်ကောင်စီက ခလရ(၅၈)ပတ်ဝန်းကျင်၌ ကာကင်းအများအပြားချထားပြီး မိုင်းများလည်းထောင်ထားသည်။ ပြီးခဲ့သည့်ဇွန်လကလည်း ခလရ(၅၈)အနီးရှိ ဘုန်းကြီးကျောင်းမှ သံဃာတော်တစ်ပါး မိုင်းနင်းမိပြီး ဒဏ်ရာအပြင်းအထန်ရရှိခဲ့သည်။
စစ်ကောင်စီသည် ဝိုင်းမော်မြို့နှင့် (၂)မိုင်ခန့်အကွာရှိ မုတ်လွဲရာလမ်းဆုံ၌ အင်အား ၁၀၀ခန့်တပ်ဆွဲထားပြီး လက်နက်ကြီးတပ်ဆင်ထားသည်။
စစ်ကောင်စီက မြစ်ကြီးနားမြို့ရှိ မြောက်ပိုင်းတိုင်းစစ်ဌာနချုပ်၊ ခလရ(၅၈)နှင့်မုတ်လွဲရာလမ်းဆုံမှနေ၍ လက်နက်ကြီးများ မကြာခဏပစ်ခတ်နေကြောင်းဒေသခံများက ပြောသည်။
Leave a Reply