ဖမ်းမိထားတဲ့ ဘီလူးစစ်ကြောင်းမှူးနဲ့အဖွဲ့ကို စစ်ဆေးနေ (ရုပ်/သံ)

စစ်ကိုင်းတိုင်းက ဒေသခံတွေနဲ့ ကာကွယ်ရေးတပ်တွေအကြား အမည်ဆိုးနဲ့ ကျော်ကြားတဲ့ စစ်ကောင်စီ လက်အောက်ခံ၊ ဘီလူးစစ်ကြောင်းက စစ်ကြောင်းမှူးနဲ့အဖွဲ့ဝင်တချို့ကို ဖမ်းမိထားပြီး စစ်ဆေးမေးမြန်းမှုတွေ ပြုလုပ်နေတယ်လို့ ပြည်သူ့လွတ်မြောက်ရေးတပ်မတော် (PLA) ကအတည်ပြုပါတယ်။

ဘီလူးစစ်ကြောင်းရဲ့ စစ်ကြောင်းမှူးအပါအဝင် ၅ ဦးကို သြဂုတ်လ ၁၄ ရက်နေ့က ဖမ်းဆီးရမိခဲ့တာဖြစ်ပြီး PLA နဲ့ ပလောင် (တအောင်း) အမျိုးသားလွတ်မြောက်ရေး တပ်မတော် (TNLA) တို့ စစ်ရေး ဖော်ဆောင်နေတဲ့ မိုးကုတ်- သပိတ်ကျင်းလမ်းပေါ်က ဖော့တော့တိုက်ပွဲအတွင်းမှာ ဖမ်းဆီးရမိခဲ့တာလို့ ဆိုပါတယ်။

ဘီလူးစစ်ကြောင်းဟာ ကရင်နီနဲ့ စစ်ကိုင်းတခွင်က မြောင်၊ ဒီပဲယင်း၊ ရေဦး၊ တန့်ဆည်အပါအဝင် မြို့နယ်အများအပြားကို စစ်ကြောင်းထိုးခဲ့ပြီး ဒေသခံတွေနဲ့ ကာကွယ်ရေးတပ်တွေအကြားမှာ ရက်စက်ကြမ်းကြုတ်တဲ့ ကျူးလွန်သူတွေအဖြစ် သိထားကြတာလည်း ဖြစ်ပါတယ်။