တော်လှန်ရေး အင်အားစုက မန္တလေးကို ဝင်သိမ်းမလား

စစ်ကောင်စီ ဆန့်ကျင်ရေး တော်လှန်ရေး အင်အားစုတွေက မန္တလေးတိုင်း မြောက်ပိုင်းက ပိုင်နက်တွေကို သိမ်းပိုက်ပြီး တောင်ဘက်ကို ဆက်လက် ချီတက်လာချိန်မှာ မြန်မာနိုင်ငံရဲ့ ဒုတိယအကြီးဆုံးမြို့ဖြစ်တဲ့ မန္တလေးဟာ တော်လှန်ရေး အင်အားစုများတွေရဲ့ အဓိကပစ်မှတ် ဖြစ်လာပါတယ်။

အရပ်သား အမျိုးသားညီညွတ်ရေးအစိုးရ (NUG) အောက်က ပြည်သူ့ကာကွယ်ရေးတပ် (PDF) တွေဟာ မြို့ကို ဝိုင်းထားပြီး မြို့ထဲကို ထိုးဖောက် ဝင်ရောက်သလို ပတ်ဝန်းကျင်က စစ်ကောင်စီစခန်းတွေကိုလည်း ဆက်လက် တိုက်ခိုက်နေတယ်။

မန္တလေးနန်းတွင်းက အလယ်ပိုင်းတိုင်းစစ်ဌာနချုပ် (လပခ) ဟာ ဒရုန်းနဲ့ ဒုံးကျည်တိုက်ခိုက်မှုတွေ ခံရတယ်။ မန္တလေးကို သိမ်းတော့မယ်ဆိုတဲ့ ခန့်မှန်းချက်တွေ ထွက်လာချိန်မှာပဲ စစ်ကောင်စီဟာ ခံစစ်တွေ တောင့်တင်းအောင် ကမန်းကတမ်း လုပ်ရတယ်။

မန္တလေးကို သိမ်းပိုက်ရေးဟာ တော်လှန်ရေး အရှိန်အဟုန် ထိန်းသိမ်းဖို့၊ စစ်ကောင်စီအုပ်ချုပ်ရေးကို စိန်ခေါ်ဖို့ အဓိကကျတယ်။ နိုင်ငံရဲ့ ဒုတိယအကြီးဆုံးမြို့ဖြစ်တဲ့ မန္တလေးဟာ အလယ်ပိုင်းတိုင်းက စစ်ဆင်ရေးတွေနဲ့ အထက်မြန်မာနိုင်ငံကို အင်အားဖြည့်တင်း ထောက်ပံ့ပို့ဆောင်ရာမှာ အရေးပါတယ်။

ဒါပေမယ့် တော်လှန်ရေး အင်အားစုတွေဟာ တပ်မြို့ ပြင်ဦးလွင်ကို အရင်သိမ်းပိုက်ရမယ်လို့ စစ်ရေးသုတေသီတွေက ပြောပါတယ်။ အဲဒီတောင်ပေါ် ခံတပ်မြို့ဟာ မန္တလေးကနေ ၇၄ ကီလိုမီတာ (၄၅ မိုင်ကျော်သာ) ဝေးပြီး စစ်တက္ကသိုလ်နဲ့ စစ်သင်တန်းကျောင်းတွေ အများအပြားရှိတဲ့မြို့ ဖြစ်ပါတယ်။

“ပြင်ဦးလွင်က မန္တလေးကို မိုးနေတယ်။ အဲဒီ ခံတပ်မြို့ကို အရင် မသိမ်းရင် တော်လှန်ရေးတပ်တွေ ထောင်ချောက်မိနိုင်တယ်” လို့ တော်လှန်ရေးတပ်တွေ ချီတက်လာတာကို လေ့လာနေတဲ့ စစ်ရေးသုတေသီတဦးက ပြောပါတယ်။

စစ်ကောင်စီဟာ မန္တလေးကို ပြင်ဦးလွင်က တပ်တွေ လမ်းကြောင်း အမျိုးမျိုးနဲ့ ဖြန့်ကြက်လို့ ရတယ်လို့ သူက ရှင်းပြပါတယ်။

ပြင်ဦးလွင်ဟာ တိုင်းရင်းသားညီနောင် မဟာမိတ်တပ်တွေက ရှမ်းပြည်မြောက်ပိုင်းမြို့တော် လားရှိုးအပါအဝင် မြို့ပေါင်း ၂၅ မြို့ကို ထိန်းချုပ်ထားတဲ့ ရှမ်းပြည်မြောက်ပိုင်းနယ်စပ်မှာ ရှိတယ်။

လွန်ခဲ့တဲ့လမှာ တအာင်းအမျိုးသား လွတ်မြောက်ရေး တပ်မတော် (TNLA) နဲ့ မန္တလေး ပြည်သူ့ကာကွယ်ရေးတပ် (MDY-PDF) အပါအဝင် မဟာမိတ်အဖွဲ့ဟာ ပြင်ဦးလွင်က တနာရီကျော်ခရီးသာရှိတဲ့ နောင်ချိုနှင့် ကျောက်မဲကို သိမ်းပိုက်တယ်။ အဲဒီ စစ်ရေးရှုံးနိမ့်မှုကြောင့် ပြင်ဦးလွင်တပ်မြို့က စစ်တပ်မိသားစု အပါအဝင် ဒေသခံတွေ အလုံးအရင်း ထွက်ပြေးစေတယ်။

TNLA တပ်တွေက နောင်ချို-ရပ်စောက်လမ်းအပြင် ပြင်ဦးလွင် အရှေ့ဘက် တောင်ခမ်းကျေးရွာမှ တပ်ရင်း နှစ်ခုကိုလည်း သိမ်းပိုက်လိုက်တယ်။

စစ်တပ်ကနေ ပြည်သူ့ဘက်ကို ခိုလှုံပြီး ဘက်ပြောင်းလာတဲ့ ဗိုလ်ကြီးဟောင်း ဇင်ယော်က တော်လှန်ရေးတပ်တွေ မေမြို့ကို မချီတက်မီ တောင်ခမ်းကို သိမ်းပိုက်ဖို့ လိုတယ်လို့ ထောက်ပြပါတယ်။ တောင်ခမ်းက အောင်ပွဲဟာ နောင်ချိုကို ထိန်းချုပ်နိုင်ပြီး စစ်ကောင်စီက နောင်ချို-ရပ်စောက် လမ်းကနေ ရှမ်းပြည်တောင်ပိုင်းက တပ်ကူပို့တာကို တားဆီးနိုင်ပါတယ်။

“တော်လှန်ရေးတပ်တွေ ပြင်ဦးလွင်ကို သိမ်းနိုင်ရင် မန္တလေးက အလွယ်တကူ ကျဆုံးမယ်” လို့ သူကပြောပါတယ်။

ဒါပေမယ့် မန္တလေးက အလယ်ပိုင်းတိုင်းစစ်ဌာနချုပ်ကို သိမ်းဖို့ တော်လှန်ရေးတပ်တွေဟာ မြို့မြောက်ဘက်က အဓိက စစ်တပ်အမာခံ စခန်းတခုအပါအဝင် တပ်ရင်းဌာနချုပ် အများအပြားကို သိမ်းပိုက်ရပါမယ်လို့ ဗိုလ်ကြီးဟောင်း ဇင်ယော်က ပြောပါတယ်။ တချိန်တည်းမှာ စစ်ကောင်စီဟာ မန္တလေးနန်းတွင်းနဲ့ အခြားနေရာတွေမှာ ကာကွယ်ရေးအင်အားစုပြီး တိုက်ခိုက်မှုကို ခံစစ်ပြင် စောင့်နေပါတယ်။

တော်လှန်ရေးတပ်တွေက အလယ်ပိုင်းတိုင်းစစ်ဌာနချုပ်ကို ၁၀၇ မမ ဒုံးကျည် ဒါဇင်ပေါင်းများစွာနဲ့ အင်္ဂါနေ့နံနက်မှာ တိုက်ခိုက်တယ်။ ဒုံးကျည် ခုနစ်လုံးက ပစ်မှတ်ကိုထိမှန်ပြီး စစ်ကောင်စီစစ်သား အများအပြားသေတယ်လို့ သူတို့က ပြောတယ်။

မန္တလေး PDF နဲ့ မဟာမိတ် တော်လှန်ရေးတပ်တွေဟာ မန္တလေးမြို့ မြောက်ဘက်က လေကြောင်းကာကွယ်ရေးတပ်နဲ့ အရှေ့ပိုင်း မြို့စွန်က စခန်းတွေ အပါအဝင် စစ်ကောင်စီစခန်း အနည်းဆုံး ၃၅ ခုကို သိမ်းပိုက်ထားပါတယ်။

တချိန်တည်းမှာပဲ PDF တပ်အများအပြားဟာ မန္တလေးရဲ့တောင်ဘက် မြို့နယ် လေးခုမှာ မြင်းခြံခရိုင် အထူးစစ်ဆင်ရေးလို့ခေါ်တဲ့ ညှိနှိုင်းစစ်ဆင်ရေးကို ပြုလုပ်နေပါတယ်။

ဒါပေမယ့် မန္တလေးကို သိမ်းပိုက်ဖို့ PDF တပ်တွေဟာ တိုင်းရင်းသားလက်နက်ကိုင် အဖွဲ့အစည်းတွေက စစ်တပ်ကို တိုက်ခဲ့တဲ့ အတွေ့အကြုံ ဆယ်စုနှစ်ပေါင်းများစွာကို အသုံးပြုဖို့ လိုတယ်လို့ ဗိုလ်ကြီးဟောင်း ဇင်ယော်က ပြောပါတယ်။

(ဧရာဝတီ အင်္ဂလိပ်ပိုင်းပါ As Resistance Enters Mandalay, is Myanmar’s Second City on Brink of Falling? ဘာသာပြန်သည်။)