ညောင်ဦးမြို့နယ်တွင် စစ်ကောင်စီလှည့်ကင်းယာဥ်တန်း တိုက်ခိုက်၊ငါးဦးသေပြီး ခုနစ်ဦးဒဏ်ရာရ

မန္တလေးတိုင်း၊ ညောင်ဦးမြို့နယ်တွင် ကင်းပတ် ရာမှပြန်လာသော စစ်ကောင်စီတပ်ယာဥ်တန်းကို ပူးပေါင်းတပ်ဖွဲ့များနှင့်အတူ ကြားဖြတ်တိုက်ခိုက်ခဲ့ကြောင်း ညောင်ဦးမြို့နယ်- ပကဖ(ပုဂံပြည် ဘီလူးတပ်)မှ တာဝန်ရှိသူတစ်ဦးကပြောသည်။

စက်တင်ဘာ ၂၀ ရက် ညနေ ၃နာရီခွဲခန့်က ညောင်ဦးမြို့နယ် ငါ့သရောက်-ဇဂျမ်းလမ်းမှ ကင်းပတ်ပြန်လာသော စစ်ကောင်စီလက်အောက်ခံ စစ်သားနှင့်ရဲများလိုက်ပါလာသည့် ကားလေးစီးနှင့် ဆိုင်ကယ်သုံးစီးပါ ယာဥ်တန်းကို ညောင်ဦးမြို့နယ်-ပကဖ(ပုဂံပြည်ဘီလူးတပ်)နှင့် မဟာမိတ်ညီနောင် များမှ ကြားဖြတ်တိုက်ခိုက်ခဲ့ခြင်း ဖြစ်သည်။

တိုက်ခိုက်မှုတွင် စစ်ကောင်စီဘက်မှ သုံးဦးနေရာတင် သေဆုံးပြီး ကိုးဦးမှာ ပြင်းထန်ဒဏ်ရာများရရှိကာ ညောင်ဦးခရိုင် ဆေးရုံသို့ ပို့ဆောင်လိုက်ရကြောင်း ညောင်ဦးမြို့ နယ်-ပကဖမှ တာဝန်ရှိသူတစ်ဦးက ပြော သည်။

ထို့နောက် ဒဏ်ရာရသူကိုးဦးအနက် နှစ်ဦးမှာ ယမန်နေ့(စက်တင်ဘာ ၂၁ ရက်)တွင် ဆေးကုသမှုခံယူရင်း ထပ်မံသေဆုံးသွားကြောင်း ၎င်းက ဆက်ပြောသည်။

ညောင်ဦးမြို့နယ် ဒုရဲမှူးဝင်းဆန်း၊စရဖ ဖမ်းစီးရေးခေါင်းဆောင် တင်ထွန်းအောင်နှင့် မြို့ နယ်ရဲနယ်ထိန်းခေါင်းဆောင် ချစ်မိုးတို့ပါဝင်ပြီး ပြင်းထန်ဒဏ်ရာများရရှိသွားကြောင်း စုံစမ်းသိရသည်။

အထက်ပါ စစ်ဆင်းရေးအား ညောင်ဦးမြို့နယ်-ပကဖ(ပုဂံပြည်ဘီလူးတပ်)ညောင်ဦးမြို့နယ်-ပကဖ၊ တပ်ခွဲ (၃)ရန်ကြီးအောင် PDF၊ ညောင်ဦးခရိုင် တပ်ရင်း – ၅၊ တပ်ရင်း – ၁၊ ကျောက်ပန်တောင်းမြို့နယ်-ပကဖ၊ Popa Production and guerilla force၊ BLACK TIGER တပ်ဖွဲ့တို့ ပူးပေါင်းလုပ်ဆောင်ခဲ့ခြင်း ဖြစ်သည်။

(စစ်ကောင်စီလှည့်ကင်းယာဥ်တန်းမှ သေဆုံးသွားသော ရဲတစ်ဦး၏ ရုပ်အလောင်းများကိုတွေ့ရစဥ်။ဓာတ်ပုံ-ပေးပို့)