ရွှေဘိုမြို့နယ်၊ ပလိုင်းရွာမှ ရိက္ခာရှာရန် ထွက်လာသော စစ်ကောင်စီ တပ်သားများကို ကြားဖြတ် တိုက်ခိုက်မှု စစ်တပ်ဘက်မှ ၃ ဦး သေဆုံး
စစ်ကိုင်းတိုင်း၊ ရွှေဘိုမြို့နယ်၊ ပလိုင်းရွာမှ ရိက္ခာရှာရန် ထွက်လာသော အကြမ်းဖက် စစ်ကောင်စီ တပ်သားများကို ကြားဖြတ် တိုက်ခိုက်ရာ စစ်တပ်ဘက်မှ ၃ ဦး သေဆုံးခဲ့ကြောင်း လျှပ်စီးမုန်းတိုင်းပြောက်ကျားတပ်ဖွဲ့ (ပလိုင်း ပကဖ) မှ တာဝန်ရှိသူ တစ်ဦးက ပြောဆိုသည်။
ဒီဇင်ဘာလ ၆ ရက်နေ့ မွန်းလွဲ ၃ နာရီ ၄၅ မိနစ်ခန့်တွင် ရွှေဘိုမြို့နယ်၊ ပလိုင်းရွာ၌ အထိုင်ချ တပ်စွဲထားသော ရိက္ခာ ထွက်ရှာသည့် အကြမ်းဖက် စစ်ကောင်စီ တပ်သားများကို တော်လှန်ရေး ရဲဘော်များက ကင်းပုန်းဝပ်၍ ကြားဖြတ် တိုက်ခိုက်ခဲ့ကြောင်း သိရသည်။
ယင်း တိုက်ခိုက်မှု အတွင်း အကြမ်းဖက် စစ်ကောင်စီ တပ်သား ၃ ဦးသေဆုံးပြီး ၁ ဦး ပြင်းထန်ဒဏ်ရာရရှိခဲ့ကြောင်း၊ တော်လှန်ရေး ရဲဘော်များ အထိအခိုက်မရှိ ဆုတ်ခွာနိုင်ခဲ့ကြောင်း သိရှိရသည်။
“စစ်ခွေးနဲ့ ပျူခွေးတွေ သူတို့ခြံမှာ ရိက္ခာပြတ်ပြီး ငတ်နေတော့ ခြံအပြင်ဘက်ကို ရိက္ခာထွက်ရှာတာ တော်လှန်ရေး အဖွဲ့တွေက ကင်းပုန်းဝပ်ပြီး ပြောက်ကျားစနစ်နဲ့ တိုက်ခိုက်ခဲ့တာ စစ်ခွေးတွေဘက်က ၃ ကောင်သေတယ်။ ၁ ကောင်ကတော့ အပြင်းအထန် ဒဏ်ရာရတယ်။ တော်လှန်ရေး ရဲဘော်တွေ အထိခိုက်မရှိ ပြန်လည် ဆုတ်ခွာနိုင်ခဲ့ပါတယ်” ဟု လျှပ်စီးမုန်းတိုင်းပြောက်ကျားတပ်ဖွဲ့ (ပလိုင်း ပကဖ) မှ တာဝန်ရှိသူ တစ်ဦးက ပြောဆိုသည်။
အဆိုပါ တိုက်ခိုက်မှုကို ရွှေဘိုမြိုနယ် လျှပ်စီးမုန်းတိုင်းပြောက်ကျားတပ်ဖွဲ့ (ပလိုင်း ပကဖ) နှင့် ရန်ကြီးအောင် ပကဖ တို့က ပူးပေါင်း လုပ်ဆောင်ခဲ့ကြောင်း သိရသည်။
Leave a Reply