၁၀၂၇ ဒုတိယလှိုင်း စစ်ဆင်ရေးကို ထောက်ခံသည့်အနေဖြင့် ရန်ကုန်မြို့ပြ စစ်ဆင်ရေးများ ဆောင်ရွက်မည်ဟု Operation Flame (OF)က ကြေညာ
ရန်ကုန်တိုင်း၊ မင်္ဂလာဒုံမြို့နယ်ရှိ ခလရ ၈၂ အစောင့်ဂိတ်နှင့် လှည်းကူးမြို့နယ်ရှိ စစ်မှုထမ်းဟောင်းရုံးကို မိုင်းခွဲတိုက်ခိုက်ခဲ့ကြောင်း ရန်ကုန်မြို့ပြစစ်ဆင်ရေးအဖွဲ့ဖြစ်သော Operation Flame (OF)က ပြောဆိုသည်။
ယနေ့ ဇူလိုင်လ ၃၀ရက်နေ့ ည ၇နာရီ ၁၀မိနစ်ဝန်းကျင်အချိန် လှည်းကူးမြို့နယ် ရန်ကုန်-ပဲခူးလမ်းမပေါ်ရှိ စစ်မှုထမ်းဟောင်းရုံးနှင့် ည ၇နာရီ၁၅မိနစ်ဝန်းကျင်အချိန် မင်္ဂလာဒုံမြို့နယ် ရွှေနံ့သာရပ်ကွက်၊ အမှတ်၃လမ်းမပေါ်ရှိ အကြမ်းဖက်စစ်တပ် ခလရ ၈၂ အစောင့်ဂိတ်ကင်းစခန်းတို့ကို အဝေးထိန်းမိုင်းအသုံးပြုပြီး ဖောက်ခွဲတိုက်ခိုက်ခဲ့ကြောင်း၊ တိုက်ခိုက်မှုအပြီး ရန်သူဖက်မှထိခိုက်မှုတစ်ချို့ရှိခဲ့ပြီး အသေးစိတ်အခြေအနေများအား စုံစမ်းနေဆဲဖြစ်ကြောင်း သိရှိရသည်။
“ပေါက်ကွဲသံတွေကြားရတယ်။ ည ၈ နာရီ ၁၅ မိနစ်လောက်မှာ မှော်ဘီလေတပ်က ရဟတ်ယာဉ်တွေ နိမ့်နိမ့်လေးပျံပြီး စလိုက်မီးတွေနဲ့ အောက်ကို ထိုးပြီး ရှာတာတွေ တွေ့ရတယ်” ဟု ဒေသပြည်သူတစ်ဦးက ပြောဆိုသည်။
အဆိုပါ ဖောက်ခွဲတိုက်ခိုက်မှု စစ်ဆင်ရေးပြီးဆုံးပြီးနောက် တော်လှန်ရေးအဖွဲ့သားများအားလုံး ဘေးကင်းရာသို့ ရောက်ရှိနေပြီဖြစ်ကြောင်း၊ ရန်ကုန်မြို့ပြတော်လှန်ရေး မဟာမိတ်များအားလုံးနှင့်အတူ လက်တွဲပြီး အကြမ်းဖက်စစ်တပ်ကို အရှိန်မြင့်တိုက်ခိုက် ချေမှုန်းသွားမည်ဖြစ်ကြောင်း၊ မြောက်ပိုင်းညီနောင်၃ဖွဲ့နှင့်တော်လှန်ရေးအင်အားစုများ၏ “၁၀၂၇ စစ်ဆင်ရေး အပိုင်း ၂ ”ကို အပြည့်အဝထောက်ခံပြီး ရန်ကုန်မြို့ပြစစ်ဆင်ရေးကိုလည်း ဟန်ချက်ညီဖော်ဆောင်သွားဖြစ်ကြောင်း Operation Flame (OF)က ကြေညာထားသည်။